रामेछाप । २०७४ सालको स्थानिय तहको निर्वाचनपछि लिखु तामाकोशी गाउँपालिका–७ तिल्पुङ्गका वडा अध्यक्ष शुबाष बोहोरासँग चार राजनितिक दलका प्रतिनिधिहरुले आर्थिक प्रतिवेदन माग गरेका छन् ।
स्थानिय तहको निर्वाचन सम्पन्न भएको करिव ५ वर्ष बित्न लाग्दा समेत वडा अध्यक्ष बोहोराले अहिलेसम्म वडामा एकवटा पनि सार्वजनिक सुनुवाई कार्यक्रम गरेका छैनन् । त्यसैगरी वडा कार्यालयमा आएको बजेट र खर्चको बिषयमा समेत कुनै आर्थिक प्रतिवेदन सार्वजनिक नगरेपछि तिल्पुङ्गका चार राजनितिक दलका प्रतिनिधिहरुले वडाले गरेको रकम खर्चको आर्थिक प्रतिवेदन माग गर्दै वडा कार्यालयमा शुक्रबार निवेदन बुझाएका हुन् ।
पालिकास्तरवाट वडा कार्यालयमा आएको बजेट वडा अध्यक्ष बोहोराले कुनै पनि विकास निमार्णका काम नै नगरी बर्षेनी रकम फ्रिज गर्दा स्थानिय नागरिकहरुले राज्यबाट पाउनु पर्ने सबै सेवा सुविधाहरु लिन बन्चित हुनु परेको राष्ट्रिय प्रजातन्त्र पार्टी प्रतिनिधि ज्ञानवहादुर बुढाथोकीले जानकारी दिए । उनले भने– २०७४ सालमा निर्वाचित भएका वडा अध्यक्षले आफ्नो पदावधि सकिनलाग्दा समेत अहिलेसम्म कुनै पनि सार्वजनिक सुनुवाई कार्यक्रम नगर्नु र वडा कार्यालय मार्फत भएका खर्चको विवरण समेत सार्वजनिक नगर्नु दुःखद कुरा भएको बताए ।
वडा कार्यालयले २०७४ सालदेखी २०७८ सालसम्मको सबै खर्चको विवरण र सहितको आर्थिक प्रतिवेदन ७ दिनभित्र नबुझाएमा कडा कदम चाल्ने चार राजनितिक दलका प्रतिनिधिहरुले बुझाएको मागपत्रमा भनिएको छ । अध्यक्ष बोहोराले गरेको काम र खर्चको विवरण माग गर्दै नेपाली काँग्रेस, नेकपा माओवादी केन्द्र, नेकपा एकिकृत समाजवादी र राप्रपा नेपालले वडा कार्यालयमा निवेदन पेश गरेका हुन ।
स्थानिय तहको निर्वाचन पछि देखी नै तिल्पुङ्गका वडा अध्यक्ष शुबाष बोहोराले नागरिकप्रति गर्नुपर्ने काम प्रति त्यति चासो नदेखाएको र जनताप्रति गर्ने व्यहार हदैसम्मको गैह्रजिम्मेवारपूर्ण गर्दै आएकाले अब आउने स्थानिय तहको निर्वाचनमा जनताले उनलाई दण्डित गरेर देखाउनु पर्ने समय आएको नेपाली काँग्रेस लिखु तामाकोशी गाउँपालिकाका सचिव बिरेन्द्र बोहोराले जानकारी दिए ।
