रामेछाप । ७२ औं राष्ट्रिय प्रजातन्त्र दिवसको अवसरमा रामेछाप कारागारमा जेल जिवन विताइरहेका ८ जना कैदीवन्दीले आममाफी पाएका छन् ।
राष्ट्रिय प्रजातन्त्रको दिवसको अवसरमा राष्ट्रपति विद्यादेवी भण्डारीले कैदीवन्दीलाई दिएको माफी मिनाहामा रामेछापका ८ जना कैदीवन्दी परेका हुन् । आममाफी पाएसँगै उनीहरु आआफ्नो घरतर्फ लागेका छन । विभिन्न मुद्धा लागेर जेल जीवन विताइरहेका उनीहरुको अदालतले तोकेको कैदको ५० प्रतिशत कैद भुक्तान गरिसकेका र ५० प्रतिशत कैद भुक्तान हुन बाँकी रहेका उनीहरुलाई बाँकी कैदको आम माफी दिइएको हो ।
जिल्ला कारागार कार्यालय रामेछापमा रहेर ५० प्रतिशत कैद भुक्तान गरिसकेका १४ जना कैदी वन्दीको माफी मिनाहाको लागि सिफारिस गरिएकोमा ८ जनाको मात्रै माफी मिनाहा भएको पत्र गृह मन्त्रालय मार्फत आएको जिल्ला कारागार कार्यालय रामेछापका जेलर राकृष्ण घिमिरेले जानकारी दिए ।
उनका अनुसार माफी मिनाहा पाउने कैदी वन्दीहरुमा नकबजनी चोरी १ जना, सवारी ज्यान मुद्धाका ३ जना, कर्तव्य ज्यान मुद्धाका २ जना, वहुविवाह १ जना र ज्यान मार्ने उद्योगका १ जना गरि ८ जना कैदी बन्दी रहेका छन् । माफी मिनाहा पाउने कैदीवन्दीहरु गुल्मी, सोलुखुम्वु, सिन्धुली, धनुषा,उदयपुर र रामेछापका रहेका छन् ।
