मन्थली । सबारी दुर्घटनामा बृद्धि भएसँगै जिल्ला ट्राफिक प्रहरी कार्यालय रामेछापले शुरु गरेको सवारी दुर्घटना न्युनीकरणको लागि गरिएको सप्ताहाव्यापी कार्यक्रम सोमवार सम्पन्न भएको छ ।
एकहप्तासम्म चलेको उक्त कार्यक्रमको अन्तिम दिन जिल्ला समन्वय समिति रामेछापको प्राङ्णमा सहभागी भएका सहभागीहरुले दुर्घटना न्युनिकरण सम्वन्धि लेखिएको स्लोगन सहितको विभिन्न प्लेकार्ड र ब्यानर सहित निस्किएको र्याली मन्थली वजार परिक्रममा गरि स्थानिय देवकोटा चोकमा कोणसभामा परिणत भएको थियो ।
कोणसभामा बोल्दै रामेछापका प्रमुख जिल्ला अधिकारी दीपक कुमार पहाडीले जिल्लामा हुने सवारी दुर्घटना न्युनीकरणको लागि ट्राफिक प्रहरीले उल्लेख्य रुपमा काम गरेको जानकारी दिए । उनले दुर्घटनाको न्युनीकरण र जोखिमको बिषमा गरेको यो अभियानले सवारी चालक र यात्रु दुवैले ट्राफिक नियम पालना गर्ने हो भने ठूलो सवारी दुर्घटनावाट जोगिन सकिने समेत बताए ।
कार्यक्रमको पहिलो दिन प्रहरीले जिल्लाका विभिन्न रुटहरुमा चल्ने यातायातका साधनहरुमा स्टीकर टाँस गरेर कार्यक्रमको शुरुवात गरेको थियो । ट्राफिक प्रहरीले शुरुवात गरेको यो अभियानमा विद्यालयमा अध्ययनरत बालबालिकाहरुलाई जनचेतनामुलक शिक्षाको विषयमा विद्यालयमा नै गएर कक्षा लिएको, चालक र यात्रुहरुसँग अन्तरक्रीया कार्यक्रम गरेको, त्यसैगरी सामाजिक संस्था जेसिस र प्रहरी मिलेर मन्थली क्याम्पसमा जनचेतना मुलक कार्यक्रमहरु संचालन गरिएको जिल्ला ट्राफिक प्रहरी कार्यालयका प्रमुख बिकल भट्टराईले जानकारी दिए ।
