रामेछाप । दोरम्बा गाउँपालिकाले गाउँपालिकामा उत्पादित आलुको छुट्टै पहिचान बनाएर बजारीकरण गर्ने तयारी गरेको छ । अन्यन्त्र उत्पादित आलुलाई दोरम्बाको आलुको पहिचान दिएर बिक्रिबितरण भएको भन्दै गाउँपालिकाले आलुको ब्राण्डिङ गर्न लागेको हो । आलुको पकेट क्षेत्रको रुपमा दोरम्बा शैलुङ्ग गाउँपालिकालाई पहिचान दिलाउन गाउँपालिका लागी परेको गाउँपालिका अध्यक्ष कमानसिंह मोक्तानले जानकारी दिए ।
धार्मिक एवं ऐतिहासिक क्षेत्र भनेर चिनिने दोरम्बा शैलुङ्ग गाउँपालिका अब आलु जोनको रुपमा पनि चिनिने भएको छ । आन्तरिक तथा बाह्य पर्यटकको आकर्षक केन्द्र रहेको शैलुङ्गलाई अब आलु जोनको रुपमा पनी दोरम्बा गाउँपालिकालाई चिनाउन आफुहरु लागी परेको अध्यक्ष मोक्तानले बताए ।
अध्यक्ष मोक्तानले भने आफुहरुको नेपालको धेरै ठाउँमा अत्यधिक माग रहेको दोरम्बाको आलुले बजारमा आफ्नो पहिचान बनाए पनि दोरम्बाको आलु भन्दै अन्यत्रको आलु बेच्ने गरेकाले आफुहरुले ब्राण्डिङ गर्न लागिएको बताए ।
दोरम्बाका अधिकांश कृषकको मुख्य खेती आलु नै भएकाले किसानलाई आलुमा निर्भर बनाउन लागिएको अध्यक्ष मोक्तानले बताएका छन् । गत वर्ष नै यसलाई लागू गर्ने भनिएपनी कोभिड –१९ का कारण पूरा गर्न नसकिएको पनि अध्यक्ष मोक्तानले बताए
गाउँपालिकाको गत वर्ष किसानलाई प्रीन्ट गरेर ५० प्रतिशत अनुदानमा बोरा उपलब्ध गराउने योजना रहेको थियो । किसानले ५० प्रतिशत मात्र तिर्दा पनि किसानलाई ठुलो भार पर्ने हुँदा आगामी श्रावण देखि नै लागू हुने गरि पुर्ण अनुदानमा प्रीन्टेट बोरा उपलब्ध गराउने गाउँपालिकाका प्रमुख प्रसाशकिय अधिकृत धिरज मरासिनीले जनाकारी दिए । ५० प्रतिशत मात्र अनुदानबाट किसान मर्कामा पर्ने भएकाले १ सय प्रतिशत नै अनुदान उपलब्ध गराउन लागिएको पनि मरासिनीले बताए । आलु जोनको योजना आएपछि किसानहरु खुशी भएका र आलु उत्पादनमा अझ अग्रसर हुन थालेका छन् । यो कार्यक्रम लागू भएपछि किसानहरूले उत्पादन गरेको आलुले बजारमा छुट्टै पहिचान बनाउने र किसानहरूको जीवनस्तर माथी पुग्ने पालिकाले जनाएको छ ।