रामेछाप । सदरमुकाम मन्थलीमा रहेका बैंक खोल्ने समय जिल्ला स्तरीय कोभिड संकट व्यवस्थापन केन्द्रले आलोपालो प्रणाली लगाएसँगै कोरोना न्युनिकरणको साटो झनै कोरोना सक्रमण फैलने डर उच्च देखिएको छ ।
जिल्लामा कोरोना संक्रमणको दर फैलदै गएपछि जिल्ला स्तरीय कोभिड संकट व्यवस्थापन केन्द्रले जिल्लामा संचालन भएका बैंकहरुलाई आलोपालो प्रणालीवाट हप्ताको तीन दिन खोल्ने अनुमती दिएसँगै ती वैंकहरुमा रकम झिक्न आउने सेवाग्राहीहरुको भिडभाड वढेसँगै कोरोना संक्रमण घट्नुको सट्टा उल्टै थपिने चिन्ता सेवाग्राहीहरुमा परेको हो ।
बाणिज्य बैंकमा रकम झिक्न सोमवार विहान १० वजेदेखी लाइन लाग्दा पनि १ वजेसम्म पनि पालो नआएको सेवाग्राही मन्थली नगरपालिका वडा नं २ का हुक्के नेपालीले बताए । उनले भने– लकडाउने गर्दा आफुुसँग भएको खर्च पनि सकियो । खर्च गर्न बैंकमा राखेको पैसा नझिकी भएन । विहान देखी लाइन लागेको अहिलेसम्म पालो आउने कुनै छाटकाट नै छैन । तातो घाममा उभिएर शरिर पुरै कालो भइसक्यो । मुख सुकेर मर्न लागिसकियो । वजार सबै बन्द छ । पानी किनेर खाने ठाउँसमेत छैन । घामले असिनपसिन हुँदा वेहोस हुने होकी भन्ने पिर एकातिर छ भने अर्कोतीर लाइनमा बस्ने सेवाग्राहीको भिडभाडले झन कोरोनो पो सर्ने होकी चिन्ता अर्कोतिर भएको सेवाग्राही नेपालीले वताए ।
कोरोना संक्रमणको दर कम हुन्छ भनेर बैंक खुल्ने समय घटाएर आलोपालो प्रणाली लागु गर्दा झनै कोरोना संक्रमण हुने भय देखिएको नागरिक समाजका सदस्य बिरेन्द्र श्रेष्ठले जानकारी दिए । उनले भने– संकट व्यवस्थापन समितिले गरेको यो निर्णयले त झनै कोरोना सर्ने पो देखियो । बैकलाई आलोपालो लगाउनुको साटो बरु सबै बैंकलाई निश्चित समय तोकेर खोल्न दिएको भए बैंकहरुमा सेवाग्राहीहरुको भिडभाड कम हुनुको साथै सेवाग्राहीले सहज रुपमा सेवा पाउने सदस्य श्रेष्ठले वताए ।
जिल्ला स्तरीय कोभिड संकट व्यवस्थापन केन्द्रले हप्ताको तीन दिन विहान १० वजेदेखी १ वजेसम्म बैंक खुल्ने गरी सदरमुकाम मन्थलीमा भएका सवै बैंकहरुलाई आलोपालो प्रणाली लागु गरेको छ । वैंकहरु खोल्ने आलोपालो प्रणालीले गर्दा सेवा लिन आउने नागरिकहरु समेत झुक्किने गरेको बैंकमा सेवा लिन आउने सेवाग्राहीहरु बताउँछन् ।