रामेछाप । तामाकोशी अस्पताल रामेछापले जिल्लामा लामो समयदेखी आँखाको बिरामी भएर बसेका ८ सय ४ जनाको बिरामीहरुको निःशुल्क उपचार गरेको छ ।
तिलगंगा आँखा अस्पताल काठमाण्डौं र जिल्ला सामुदायिक आँखा केन्द्रको सहकार्यमा सदरमुकाम मन्थलीको तामाकोशी अस्पतालमा तीन दिनसम्म संचालन भएको आँखा शिविरमा २ सय २८ जनाको शल्यक्रिया गरिएको छ भने ५ सय ७६ जनाको आँखाको परिक्षण गरिएको हो । आँखा शिविर १ सय ६ जना महिला र १ सय २२ जना पुरुष गरि २ सय २८ जनाको मोतियाबिन्दुको शल्यक्रिया गरिएको तामाकोशी अस्पतालका निर्देशक गोबिन्द प्रसाद घिमिरेले जानकारी दिए ।
उनले भने– आँखाको उपचार र मोतिया बिन्दु भएका आँखाका बिरामीहरुको निःशुल्क रुपमा शल्यक्रिया गरिएको हो । आँखाको उपचारको लागि जिल्लाको ग्रामिण भेगवाट सदरमुकामसम्म आएका बिरामीहरुको कोही आफन्त नभएको र बस्ने ठाउँ नभएका सबै विरामी र कुरुवाहरुलाई खाने बस्ने समेतको व्यवस्थापन तामाकोशी अस्पतालले निःशुल्क व्यवस्थापन गरेको पनि निर्देशक घिमिरेले बताए ।
तामाकोशी अस्पतालले गएका वर्षहरुमा पनि जिल्लाको ग्रामिण भेगहरुमा गएर आँखाको जाँच गर्ने र मोतिया बिन्दु भएका बिरामीहरुको हकमा प्रत्येक वर्ष विभिन्न संस्थाहरुको सहयोगमा आँखा शिविर संचालन गर्दै आएको छ । संस्थाले यसवर्ष पनि गाउँगाउँमा आँखा जाँच गराएर अप्रेशन गर्नुपर्ने बिरामीहरु छनौट गरि ती बिरामीहरुलाई निःशुल्क रुपमा शिविरको आयोजना गरेको हो । तीनदिनसम्म संचालन भएको आँखा शिविरमा रमेश पराजुलीको नेतृत्वमा आएको टोलिमा बरिष्ठ सर्जन डा.संयम वजिमय, योगीता भण्डारी डा.प्रतिभा शाहि लगाएतको टोली उपचारमा संलग्न भएका थिए ।
तामाकोशी अस्पतालले आयोजना गरेको उक्त शिविरमा तामाकोशी सेवा समिति, मन्थली बचत तथा ऋण सहकारी संस्था लिमिटेड र जिल्ला अस्पताल रामेछापको सहयोगमा उक्त शिविरको आयोजना गरिएको आयोजक संस्थाले जनाएको छ ।
