रामेछाप । रामेछाप उद्योग वाणिज्य संघले आफ्नो २८ औं स्थापना दिवस शुक्रवार एक कार्यक्रमको आयोजना गरि मनाएको छ ।
संस्थाले आफ्नो स्थापना दिवसको अवसर पारेर संस्थापक अध्यक्ष एवं सदस्यहरुलाई सम्मान समेत गरेको छ । रामेछाप उद्योग व्यापार संघ २०४९ साल फागुन २१ गते जिल्ला प्रशासन कार्यालय रामेछापमा विधिवत रुपमा दर्ता भएर व्यवसायीहरुको हकहितको क्षेत्रमा काम गर्दै आएको छ । रामेछाप उद्योग वणिज्य संघले पहिलो पटक आफ्नो स्थापना दिवस मनाएको हो ।
कार्यक्रमका प्रमुख अतिथि मन्थली नगरपालिकाका प्रमुख रमेशकुमार बस्नेतले उद्योग वाणिज्य संघले आफ्नो स्थापना दिवसको अवसर पारेर गरेको कार्यक्रम अतिनै महत्वपूर्ण रहेको बताए । उनले भने– धेरैजसोले आफ्नो संस्थाको स्थापना दिवसको कुनै कार्यक्रम नै मनाउँदैनन् । यसको शुरुवात रामेछाप उद्योग वाणिज्य संघले गरेको छ । आगामी दिनमा पनि यसलाई निरन्तरता दिन सक्नुपर्छ । मन्थली नगरपालिकाले पनि यसवर्ष स्थापना दिवसको कार्यक्रम गरेर मनाएको नगर प्रमुख बस्नेतले बताए ।
कार्यक्रमका अतिथि सहायक प्रमुख जिल्ला अधिकारी तुलराज सुनुवारले उद्योग वाणिज्य संघले आफ्नो स्थापना दिवसको अवसर पारेर संस्थापन अध्यक्ष तथा सदस्यहरुलाई गरेको सम्मान निकै महत्वपूर्ण रहेको बताए । जसले संस्थालाई हुर्काउने र संस्थालाई जोगाईराख्न काम गर्नुभयो, उहाँहरुलाई सम्मान गरेर उद्योग वाणिज्य संघले उदाहरणिय काम गरेको बताए । कार्यक्रममा वोल्दै सहायक प्रजिअ सुनुवारले व्यवसायीले आफ्नो व्यवसाय मात्रै हेर्ने हैन, आम उपभोक्ताहरुको पनि हित हुने किसिमले गुणस्तरयुक्त सामाग्रीहरु विक्रीवितरण गर्नु पर्नेमा जोड दिए ।
कार्यक्रम रामेछाप उद्योग वाणिज्य संघका अध्यक्ष केशवप्रसाद घिमिरेको अध्यक्षतामा भएको थियो । कार्यक्रममा रामेछाप उद्योग वाणिज्य संघका पूर्व अध्यक्ष एवं नेपाल उद्योग वाणिज्य महासंघ बागमती प्रदेशका कार्यकारिणी सदस्य श्याम थापाले यसअघि उद्योग वाणिज्य संघले व्यवसायीहरुको हकहितको क्षेत्रमा मात्रै काम गर्दै आएकोमा यसपटक भने संस्थाले स्थापनाकाल देखी योगदान पुर्याउँदै आएका सदस्यहरुलाई सम्मानित गरेर नयाँ कामको थालनी गरेको बताए ।
उद्योग वाणिज्य संघले २८ औं स्थापना दिवसको अवसर पारेर संस्थापक अध्यक्ष प्रज्जलकुमार बज्राचार्य, संस्थापन कोषाध्यक्ष प्रेमनारायण श्रेष्ठ, सदस्यहरुमा क्रमशः नारायणदाश श्रेष्ठ, रामकुमार श्रेष्ठ, बिष्णुबहादुर थापामगर, कुमार श्रेष्ठ, मोहनकुमार श्रेष्ठ, स्व.गोपाल प्रसाद ढुगेल, स्व.कृष्णदाश श्रेष्ठ, काजीदाश श्रेष्ठ र हरिवहादुर लामालाई सम्मानित गरेको छ । सम्मानित हुने सदस्यहरुलाई कार्यक्रमका प्रमुख अतिथि रमेशकुमार बस्नेतले ढाका टोपी, खादा, माला र सम्मान–पत्रले सम्मानित गरेका थिए ।
सम्मान पाएसँगै पूर्व अध्यक्ष एवं सल्लाहाकार सदस्य नारायणदाश श्रेष्ठले उद्योग वाणिज्य संघले स्थापना कालमा गरेको योगदानको महत्व बुझेर गरेको सम्मानले आफु निकै हर्षित भएको बताए । उनले भने– हामीले धेरै अथक प्रयासका साथ संस्था स्थापना गरेका थियौ । शुरुमा व्यवसायी साथीहरु एकदम कम थिए । सदरमुकाम मन्थली झरेपछि व्यवसायीहरुले पसल खुल्ने क्रम बढेसँगै यो संस्थाको स्थापना गरेका थियौ । संस्थाको भवन निमार्णको लागि जग्गा व्यवस्थापन देखी भवन निमार्णको काम समेत आफ्नै पालामा शुरु गरेको थिए । अहिले संस्था पहिलाको जस्तो छैन्, मजवुत छ, व्यवसायी साथीहरु पनि धेरै हुनुहुन्छ यसमा म सारै खुशी छु श्रेष्ठले बताए ।
