काठमाडौं । नेपाल कम्युनिस्ट पार्टी वली समुहले नेत्रविक्रम चन्द विप्लवललाई उपप्रधानमन्त्री देखी महासचिव सम्मको प्रस्ताव राखेको विश्वस्त स्रोतले बताएको छ । सरकारसँग अचानक वार्तामा आउन सकारात्मक भएका प्रतिबन्धित नेपाल कम्युनिस्ट पार्टीका महासचिव नेत्रविक्रम चन्द विप्लवले एकपछि अर्को आश्चर्यचकित पार्ने कदमहरु चाल्ने संकेतहरु मिलेको छ ।
ओली सरकारले कठोर नीति लिएपनि विप्लव वार्ताका लागि तयार हुनुमा कुनै खास राजनीतिक प्रस्तावले काम गरेको छ । विश्वस्त स्रोतका अनुसार विप्लवलाई प्रधानमन्त्री केपी शर्मा ओलीले खटाएका नेपाल कम्युनिस्ट पार्टीका नेताहरुमार्फत् पार्टी महासचिवको प्रस्ताव गरिएको छ । उनी ओली समूहको नेकपासँग एकीकरण गर्न आएमा वली समुहले विप्लवलाई महासचिव बनाउने प्रस्ताव पुगेको हो ।
विप्लवलाई सरकारमा उपप्रधानमन्त्री सहित महत्वपूर्ण मन्त्रालयको समेत प्रस्ताव पुगेको छ । त्यसबारे विप्लव पक्षबाट भने कुनै जवाफ आएको छैन ।
जनयुद्ध लड्दाका तत्कालिन नेकपा माओवादीका अध्यक्ष पुष्पकमल दाहाल प्रचण्डबाट दूरी राखेर विप्लव ओलीसँग नजिकिनुलाई चासोका साथ हेरिएको छ । विप्लव शासकीय स्वरुप समेत फेर्नुपर्ने पक्षमा छन् । ओलीको पछिल्लो भूमिका त्यसैतर्फ हुने संकेतहरु मिल्न थालेको छ ।
यसैगरी, ८ फागुनमा अकस्मात् प्रेस विज्ञप्ति जारी गरी सरकारसँग संवाद र वार्ताका लागि सकारात्मक रहेको बताएर धेरैलाई आश्चर्यचकित पारेका थिए । विप्लव संवादका लागि सकारात्मक भएको विज्ञप्ति आउनु अघि उनी नेतृत्वको नेकपाले तीन कम्युनिस्ट घटकसँग २९ माघमा रणनैतिक मोर्चा गठन गरी घोषणा गरिसकेको छ । मोर्चामा मोहन वैद्य किरण, ऋषि कट्टेल र आहुती नेतृत्वको कम्युनिस्ट पार्टी छन् । २० माघमा खानेपानीमन्त्री मणि थापाले नख्खु कारागार पुगी विप्लव पक्षका नेता हेमन्त प्रकाश ओलीलाई भेटेका थिए । सुदर्शन भनिने ओलीसँगको भेट वार्ताको वातावरण बनाउने उद्देश्यले थियो । यो भेटले पनि वार्ताको माहोल तयार गर्न भूमिका खेल्यो ।
समाचार स्रोत रिपोर्टस नेपाल डट कम