रामेछाप । सरकारले राष्ट्रिय प्रजातन्त्र दिवसको अवसर पारेर दिएको कैदीबन्दीको कैद सजाय माफीमा परेर रामेछापका १३ कैदीबन्दी जेलमुक्त भएका छन् ।
रामेछाप कारागारमा रही कम्तीमा ५० प्रतिशत कैद भुक्तान गरेका र असल चालचलन भएका १३ जना कैदी बन्दीहरुको बाँकी कैद अवधि मिनाहा दिन कारागार कार्यालय रामेछापले गरेको सिफारिसको आधारमा कैदीबन्दीहरुले मिनाहा पाएका र उनीहरु कैद मुक्त भएका कारागार कार्यालय रामेछापका जेलर रामकृष्ण घिमिरेले जानकारी दिए ।
उनका अनुसार– कारागारबाट कैद मुक्त हुनेहरुमा कर्तव्य ज्यान मुद्धा, सवारी ज्यान मुद्धा, लागु औषध मुद्धामा परेका र एक जना ६६ वर्षिय जेष्ठ नागरिक गरि १३ जनाले माफी मिनाहा पाएका हुन् । उनीहरु सबैजना जेलमुक्त भएका छन् ।
सर्वोच्च अदालतको गत साउन २९ गतेको परमादेश समेतको आधारमा फौजदारी कसूर (सजाय निर्धारण तथा कार्यान्वयन ऐन), २०७४ लागू हुनुपूर्व गरेको कसूरमा जन्मकैदको सजाय तोकिएकाहरुलाई कैद छुट दिएको हो ।