रामेछाप । काठमाण्डौंका ४९ बर्षिय रजुनमान श्रेष्ठको हत्यामा संलग्न रामेछाप लिखुतामाकोशी गाउँपालिका वडा नं–३ बिजुलीकोटका एकै घरका चारजना दाजुभाई पक्राउ परेका छन् ।
काठमाण्डौंको गुहेश्वरी मन्दिर छेउ बागमती नदिमा भेटिएको शवको अनुसन्धान गर्ने क्रममा सो घटनामा संलग्न भएको भन्दै लिखुतामाकोशी गाउँपालिका बिजुलीकोटका २० वर्षिय लाक्पा तामाङ, १८ वर्षिय बिशाल तामाङ, सन्तोष तामाङ र सन्तकुमार तामाङलाई प्रहरीले नियन्त्रणमा लिएको हो ।
उनीहरु बौद्धस्थित नयाँ बस्तीमा डेर गरि बस्दै आएका थिए, घटनामा संलग्न मध्ये तीनजनालाई नयाँ बसपार्क र बिशाललाई भने नयाँबस्तीवाट पक्राउ गरि काठमाण्डौं अदालतबाट सात दिनको म्याद थप गरि अनुसन्धानको लागि हिरासतमा राखिएको महानगरीय प्रहरी परिसर काठमाण्डौंका एसएसपी अशोक सिंहले जानकारी दिए ।
उनका अनुसार राती १२ वजे घर जाने क्रममा गुहेश्वरी मन्दिर पारिपट्टी पुग्दा गाडी बिग्रिएपछि नारायणमार्गमा गाडी छाडेर दिव्यश्वरी पार्टी प्यालेसतर्फ जादै गरेका श्रेष्ठको मोवाइल लुट्ने क्रममा उनी माथि आक्रमण गरिएको रहेछ । चारभाईको कुटाईवाट गम्भिर घाइते भएका श्रेष्ठको मोवाइल बिशाल तामाङले लिएर गएको प्रहरी अनुसन्धानवाट खुलेको छ ।
मोवाइल लुट्ने क्रममा चारजना दाजुभाईले एकैपटक आक्रमण गर्दा गम्भिर घाइते बन्न पुगेका श्रेष्ठ हिड्न नसकेपछि बागमती नदीमा डुबेका थिए । उनको त्यहीँ नदीमा ज्यान गएको हो ।
