रामेछाप । जिल्लाको दोरम्वा गाउँपालिका वडा नं–५ गुन्सीको गुराँसेमा रहेको पाँचकन्या काली भगवती मन्दीर प्रचारप्रसारको अभावमा ओझेलमा परेको छ ।
स्थानीय गाउँलेहरुले महत्वपूर्ण पिठका रुपमा मान्दै आएको करिब पाँचसय वर्ष पुरानो सो मन्दीर धार्मिक र पर्यटकीय दृष्टिकोणले समेत महत्वपूर्ण छ । हप्ताको मंगलवार, बिहीबार र शनिबार नियमित पूजा गरी बलिदिने गरिएको सो मन्दीरमा बोका, कुखुरा र हाँसको बलि चढाउने चलन छ । प्रत्येक वर्षको कार्तिक पूर्णिमाका दिन मगर जातिहरुले गुठी पूजागरी रातभरी डम्फु र मादल बजाएर मन्दीर परिसरमा नै जागाराम बस्ने गर्दछन् ।
त्यस्तै नेपालीहरुको महानचाड विजयादशमीको फुलपातिदेखि नवमीसम्म मन्दीर परिसर भक्तजनको पुजाआजाको लागि खुल्ला राख्ने गरिएको छ । टाढा–टाढावाट मन्दीरमा दर्शन गर्न आउने दर्शनार्थी र मन्दीरको पूजारीको लागि बस्ने ब्यवस्था नहुँदा समस्या हुँदै आएको दोरम्वा गाउँपालिका वडा नं–५ का वडा अध्यक्ष कमानसिं तामाङले जानकारी दिए ।
उनले भने– मन्दीरमा खानेपानी, शौचालय र पुजारी वस्ने भवन र मन्दीरमा टाढा–टाढाबाट पुजाआजा गर्न आउँने भक्तजनहरुलाई बस्ने भवन नहुँदा समस्या रहेको छ । स्थानियहरुले भवनको माग गरेका छन् । त्यहीँ अनुसा वडा कार्यालयले यस क्षेत्रमा आन्तरिक र बाह्य पर्यटकहरु भित्रयाउन सकिने भएकाले दोरम्वा गाउँपालिकासँग आवश्यक बजेट माग गरेर काम अघि वढाउन लागेको अध्यक्ष तामाङ बताउँछन् ।
दोरम्वाको पाचकन्या काली भगवती मन्दीरमा पुजा गर्न रामेछाप जिल्ला बाहेक ओखलढुगां, उदयपुर, सलार्ही, हेटौडा, सिन्धुली, दोलखा र काभ्रेपलान्चोक लगायत दर्जनौं जिल्लाबाट भक्तजनहरु आउँने गर्दछन् । मन्दीर वरीपरी सिंहराजा, सिहंरानी, इन्डराजा, इन्डरानी, बासुकी राजा, वासुकी रानी, सूर्यराजा, सूर्यरानी, बज्रराज बज्ररानी लागायत ५२ वटा देविदेवताहरुको वासस्थान रहेको मन्दीरका पुजारी खड्गबहादुर थापामगरले बताए ।
ऐतिहासिक महत्व बोकेको उक्त मन्दिरमा वि.स.१४४९ सालमा चढाएको घण्ट अहिलेसम्म रहेको छ । मनमा चिताएको कुरा पुग्ने विश्वासका साथ पहिला पहिला शासकहरु आफै मन्दीरमा आएर पुजा गर्ने गरेको स्थानीय वुढापाकाहरुको भनाई छ । मनोकांक्षा पूरा हुने विश्वासको आधारमा विदेश जाने युवा युवतिहरु र बच्चा नभएका दम्पत्तिहरु समेत सो मन्दीरमा पूजाआज गर्न आउने गर्दछ । यस मन्दीरमा पुजा गर्दा मनोकाँक्षा पूरा हुने जनविश्वास रहिआएको छ ।