रामेछाप । जिल्ला अस्पताल रामेछापले संचालन गरेको कोरोना भाइरस बिरुद्धको खोप अभियानमा बिहिवारसम्म १ हजार २२ जनाले कोरोना भाइरस बिरुद्धको खोप लगाएका छन् ।
जिल्ला अस्पताल रामेछापले गत माघ १४ गतेबाट शुरुवात गरेको कोरोना बिरुद्धको खोप अभियानको पहिलो चरणमा सरकारी स्वास्थ्यकर्मी, निजी स्वास्थ्यकर्मी, महिला स्वास्थ्य स्वयंसेविका, एम्बुलेन्स चालक, शब बाहन चालक, शब व्यवस्थापनमा खटिएका सुरक्षाकर्मी र सरसफाईमा खटिएका सरसफाईकर्मीहरुलाई पहिलो चरणमा लगाउन शुरुवात गरेको हो ।
कोरोना विरुद्धको खोप जिल्लामा आएपछि लगाउन शुरु गरिएको नौ दिनको अवधिमा १ हजार २२ जनालाई लगाईसकिएको जिल्ला स्वास्थ्य कार्यालय रामेछापका प्रमुख जितेन्द्रकुमार कर्णले जानकारी दिए । उनले भने– सरकारले घोषणा गरे अनुसारको पहिलो चरणको कार्यक्रम भोली शुक्रवार सकिदै छ । त्यसपछि दोश्रो चरणको लागि भ्याक्सिन आएपछि अर्को चरण अन्तर्गतको खोप अभियान संचालन गरिने प्रमुख कर्णले बताए ।
रामेछापमा पहिलो चरणमा कोरोना विरुद्ध खोप लगाएका व्यक्तिहरुमा टाउँको दुख्ने, रिंगटा लाग्ने जस्ता केही सामान्य लक्षण देखिएता पनि त्यसले खासै असर नपर्ने जिल्ला अस्पताल रामेछापले जनाएको छ ।