रामेछाप । सनराइज बैंक लिमिटेडले मन्थली नगरपालिका वडा नं–११ गेलुको सावाडाँडामा ६७ औं शाखारहित बैकिङ्ग सेवा शनिवारवाट सञ्चालनमा ल्याएको छ ।
मन्थलीको गेलुमा बिशेषगरी कृषि र रेमिट्यान्स मुख्य आयश्रोत रहेको सो क्षेत्रका बासिन्दाहरुलाई बैकिङ्ग पहुँच बढाउने उद्धेश्यका साथ शाखारहित बैकिङ्ग सेवा संञ्चालनमा ल्याइएको सनराइज बैंक लिमिटेड मन्थलीले जनाएको छ । सो शाखारहित बैकिङ्ग सेवाको उद्घाटन मन्थली नगरपालिकाकी उप–प्रमुख मायाकुमारी कार्कीले एक कार्यक्रमको आयोजना बिच गरेकी थिइन ।
बैंकको सेवा पाउन नसकेका ग्रामिण भेगका नागरिकहरुलाई बैकिङ्ग सेवाको माध्यमवाट बचत तथा भुक्तानीका लागि शाखा कार्यालय नभएको स्थानमा शाखा रहित बैकिङ्ग सेवा अन्तर्गत एटिएम कार्ड मार्फत कारोवार गर्न सकिने गरि नागरिकहरुलाई सेवा प्रदान गरिने सनराइज बैंक मन्थली शाखाका प्रबन्धक रमेशराज सुबेदीेले जानकारी दिए ।
उनले भने– यस अघि बैकिङ्ग सेवा लिन सदरमुकाम मन्थलीसम्म धाउँदै आएका गेलुका नागरिकहरुले अब उक्त सेवा लिन सदरमुकाम मन्थली आइरहनु पर्दैन् । अब गाउँमै निक्षेप संकलन, रकम भुक्तानी, रकम स्थानान्तरण, बिल भुक्तानी जस्ता सेवाहरु सहजै नागरिकले पाउने प्रबन्धक सुबेदीले बताए ।
सनराइज बैंकले हालसम् १ सय ३९ वटा शाखा, ६७ वटा शाखारहित बैकिङ्ग सेवा, १२ वटा एक्सटेन्सन काउण्टर र १ सय ६१ वटा एटिएम मार्फत ७ लाख भन्दा बढी ग्राहकहरुलाई सेवा दिदै आएको छ । सो बैंकले बैकिङ्ग सेवावाट वञ्चित रहँदै आएका नागरिकहरुलाई ध्यानमा राखेर बैकिङ्ग सेवा थप गर्दै जाने जनाएको छ ।
