काठमाडौँ । नेपाल पर्यटन बोर्डको कार्यकारी प्रमुख पदका लागि १६ जना उम्मेदवार संक्षिप्त सूचीमा परेका छन्। बोर्डको कार्यकारी प्रमुख बन्न पूर्वमन्त्री श्रद्धा श्रेष्ठसहित १६ जनाले दाबेदारी प्रस्तुत गरेका छन्।
नेपाल पर्यटन बोर्डले कार्यकारी प्रमुख छनोट तथा नियुक्ति सिफारिस कार्यविधि, २०८३ अनुसार प्राप्त आवेदन र उम्मेदवारहरूको मूल्याङ्कनका आधारमा सबैभन्दा बढी अङ्क प्राप्त गर्ने १६ जनालाई संक्षिप्त सूचीमा समावेश गरेको हो।
बोर्डको छनोट उपसमितिले सार्वजनिक गरेको सूचीमा पूर्वमन्त्री श्रद्धा श्रेष्ठ (ताप्लेजुङ), आशुतोष प्रधान र उत्तम प्रसाद देवकोटा (चितवन), टेकबहादुर महत (इलाम), धर्मराज दवाडी (चितवन), नोजल कोइराला (मोरङ), युविका भण्डारी र राजाराम केसी (काठमाडौँ) रहेका छन्।
त्यस्तै, रामचन्द्र सेढाई (गोरखा), रोहिणी प्रसाद खनाल (भक्तपुर), लक्ष्मण गौतम (दाङ), विनोद अर्याल (पाल्पा), श्रीप्रसाद भट्टराई (रुपन्देही), सन्तोष विक्रम थापा (काठमाडौँ), सुरेश सिंह बुढाल (बैतडी) र हिममत सिंह ऐर (कञ्चनपुर) पनि संक्षिप्त सूचीमा परेका छन्।
संक्षिप्त सूचीमा परेका उम्मेदवारहरूले आगामी मंसिर १० गते बिहान ८ः१५ बजे व्यावसायिक प्रस्तुतीकरणमा सहभागी हुनुपर्नेछ। प्रस्तुतीकरणका क्रममा उम्मेदवारहरूले आफ्नो शैक्षिक योग्यता तथा अनुभवसम्बन्धी सम्पूर्ण आवश्यक कागजातसहित नेपाल पर्यटन बोर्डको सचिवालयमा उपस्थित हुनुपर्ने बोर्डले जनाएको छ।
कार्यकारी प्रमुख पदका लागि प्राप्त आवेदनको मूल्याङ्कनपछि १६ जना उम्मेदवार छनोट गरिएको हो। अब व्यावसायिक प्रस्तुतीकरण तथा छनोट प्रक्रियाका आगामी चरण पूरा भएपछि बोर्डको कार्यकारी प्रमुख नियुक्तिका लागि सिफारिस गरिनेछ।
नेपाल पर्यटन बोर्डको कार्यकारी प्रमुख पदलाई पर्यटन क्षेत्रको नीति, प्रवर्द्धन र व्यवस्थापनसँग जोडेर महत्त्वपूर्ण रूपमा हेरिने भएकाले यसपटकको छनोट प्रक्रियालाई पर्यटन क्षेत्रले चासोका साथ हेरेको छ।
