रामेछाप १३ भदै । नेवारी समुदायको संस्कार र परंम्परासंग जोडिएको लाखे नाच आजबाट रामेछापको मन्थलीमा शुरु भएको छ । मन्थली बजार नजिकैको भिमसेन मन्दिरमा जम्मा भएका नेवारी समुदायका मानिसहरुले मन्दिरमा पुजा गरेर सगुन खाई लाखे नाच निकालेका हुन् । नेवारी संस्कार र परंम्परासंग जोडिएको लाखे नाच जनैपूर्णिमादेखी शुरु भएर कृष्ण अष्टमीमा समापन गर्ने चलन रहेको नेवाः देय दबु रामेछापका अध्यक्ष शेखरमान श्रेष्ठले बताउनु भयो । मन्थलीमा आजबाट शुरु भएको लाखे नाच कृष्ण अष्टमी सम्म हरेक दिन हुने नेवारी समुदायले जनाएको छ ।
नेवारी समुदायको पहिचाहनको रुपमा रहेको लाखे नाच दुष्ट आत्मालाई भगाउने र देवीदेवताहरुलाई खुशी पार्ने धार्मिक मान्यताका आधारमा निकालिने गरिएको नेवारी समुदायका अगुवा डा. सुमन कर्माचार्यले बताउनु भयो । रामेछाप जिल्लाको नेवारी समुदायको बाक्लो बस्ति भएका क्षेत्रमा आजबाट लाखे नाच शुरु गरिएको छ । जिल्लाको भंगेरी, चिसापानी, ठोसे, साँघुटार लगायतका नेवारहरुको बाक्लो बस्ति भएको ठाउँमा आजबाट लाखे नाच शुरु गरिएको स्थानीयहरुले बताएका छन् ।
