काठमाडौं । रसुवामा आएको विनाशकारी बाढीका कारण मृत्यु हुनेको संख्या २७० पुगेको छ । बिहीबार दिउँसो १ः३० बजेसम्म विभिन्न जिल्लामा बाढीका कारण मृत्यु भएका २७० जनाको शव फेला परेको प्रहरीले जनाएको छ ।
प्रहरीका अनुसार रसुवामा १७, नुवाकोटमा १२, धादिङमा २७, चितवनमा १०८, गोरखामा २०, तनहुँमा ९, नवलपरासी पूर्वमा ६२ र नवलपरासी पश्चिममा १५ जनाको शव फेला परेको छ ।
बाढीबाट प्रभावित तथा जोखिममा रहेका परिवारलाई सुरक्षित स्थानमा सार्ने कार्यलाई प्रहरीले प्राथमिकताका साथ अघि बढाएको छ । बाढीका कारण बेपत्ता भएकाहरूको खोजी तथा उद्धारका लागि विभिन्न सुरक्षा निकाय, स्थानीयवासी तथा अन्य सम्बन्धित निकायबीच समन्वय भइरहेको प्रहरीले जनाएको छ ।
बाढीका कारण विभिन्न स्थानमा सडक तथा यातायात अवरुद्ध भएपछि अवरोध हटाउने कार्यसमेत भइरहेको छ । स्थानीयवासीको सहयोग र विभिन्न निकायसँगको समन्वयमा उद्धार, खोजी तथा राहतका कामलाई निरन्तरता दिइएको प्रहरीले जनाएको छ ।
विनाशकारी बाढीबाट प्रभावित क्षेत्रमा सुरक्षाकर्मी परिचालन गरी जोखिममा रहेका नागरिकलाई सुरक्षित स्थानमा सार्ने तथा आवश्यक उद्धार कार्य भइरहेको छ । प्रहरीले बाढी प्रभावित क्षेत्रमा सतर्कता अपनाउन र जोखिमपूर्ण स्थानमा नबस्नसमेत आग्रह गरेको छ ।
