२९ साउन, काठमाडौं । नेपाली कांग्रेसका नेता डा. शेखर कोइरालाले पार्टीभित्र देखिएको विभाजन अन्त्य गर्दै कांग्रेसलाई एकढिक्का बनाउनेमा आफू विश्वस्त रहेको बताएका छन्।
शुक्रबारबाट सुरु भएको कांग्रेसको इतर पक्षको राष्ट्रिय भेलालाई सम्बोधन गर्दै कोइरालाले पार्टी अहिले विभाजित मनस्थितिबाट गुज्रिरहेको भए पनि अन्ततः सबैलाई मिलाएर अघि बढ्नुपर्ने धारणा राखे।
उनले नेपाली कांग्रेसको शक्ति नै सबै पक्षलाई समेटेर अघि बढ्ने संस्कार भएको उल्लेख गर्दै पार्टीभित्र कसैको निरंकुशता स्वीकार गर्न नसकिने स्पष्ट पारे।
“नेपाली कांग्रेस अहिले विभाजित मनस्थितिबाट गुज्रिरहेको छ । नेपाली कांग्रेस हामी मिलाउँछौँ, मिल्छ भनेर,” कोइरालाले भने, “मलाई विश्वास छ नेपाली कांग्रेस एकढिक्का हुन्छ र हुन्छ भन्ने कुरामा म विश्वस्त छु। त्यो देशको निम्ति एकढिक्का हुन जरुरी छ।”
कोइरालाले कांग्रेसले विगतदेखि नै फरक विचार र समूहलाई समेटेर अघि बढ्दै आएको दाबी गरे। लोकतान्त्रिक मूल्य, विधि र संस्थागत प्रक्रियालाई बलियो बनाउँदै पार्टीलाई एकताबद्ध बनाउनुपर्नेमा उनले जोड दिए।
“नेपाली कांग्रेसमात्रै यस्तो पार्टी हो, जसले सधैं सबैलाई मिलाएर हिँडेको पार्टी हो। हामी कसैको निरंकुशता स्वीकार गर्दैनौँ,” उनले भने।
उनले पार्टीभित्रको असहमति र मतभेदलाई संवाद तथा सहमतिका माध्यमबाट समाधान गर्नुपर्ने बताए। मुलुकमा लोकतान्त्रिक व्यवस्था र संविधानको रक्षा गर्न पनि कांग्रेस बलियो र एकताबद्ध हुन आवश्यक रहेको उनको भनाइ थियो।
कांग्रेसभित्र पछिल्लो समय देखिएको गुटगत असहमति र नेतृत्वप्रतिको असन्तुष्टिका बीच इतर पक्षले राष्ट्रिय भेला आयोजना गरेको हो। भेलामा पार्टीको वर्तमान अवस्था, आन्तरिक एकता, संगठन सुदृढीकरण तथा आगामी राजनीतिक रणनीतिबारे छलफल भइरहेको छ।
