म्याग्दीको मालिका गाउँपालिकाले दलित समुदायसँग अन्तरजातीय विवाह गरेका २५ जोडीलाई नगदसहित सम्मान गरेको छ । गाउँपालिकाको लक्षित समुदाय कार्यक्रमअन्तर्गत विनियोजित बजेटबाट केन्द्र दरवाङमा आयोजित एक समारोहका बीच उनीहरूलाई प्रतिजोडी तीन हजार ५०० रुपियाँ नगदसहित सम्मान गरिएको हो ।
समाजमा अझै पनि कायम रहेको जातीय विभेद र अदृश्य हिंसाको अन्त्य गर्दै सकारात्मक सन्देश प्रवाह गर्ने उद्देश्यले गाउँपालिकाले पहिलो पटक यस्तो कार्यक्रम आयोजना गरेको जनाएको छ । पालिकाका सातवटै वडाबाट ज्येष्ठ नागरिकदेखि युवा अवस्थाका अन्तरजातीय विवाहित जोडीहरूलाई गाउँपालिकाका अध्यक्ष बेगप्रसाद गर्बुजा, उपाध्यक्ष लक्ष्मीदेवी घर्ती पुन, प्रमुख प्रशासकीय अधिकृत हरिश्चन्द्र ढकाललगायतका जनप्रतिनिधि र कर्मचारीहरूले सम्मान गर्नुभएको थियो ।
सो अवसरमा अध्यक्ष गर्बुजाले समाजमा रहेको जातीय विभेदको पर्खाल भत्काउन र अन्तरजातीय विवाहलाई प्रोत्साहन गर्न यो कार्यक्रम कोशढुङ्गा सावित हुने विश्वास व्यक्त गर्नुभयो ।
