रामेछाप २१ – नेपाली काँग्रेसकी केन्द्रीय प्रतिनिधि सीता मिजारले पार्टीको संगठनलाई जनतासँग अझ नजिक, चलायमान र बलियो बनाउन सबै नेता तथा कार्यकर्ता एकताबद्ध भएर अघि बढ्नुपर्ने बताउनु भयो।
नेपाली काँग्रेस जिल्ला कार्य समिति रामेछापको पूर्ण बैठकलाई सम्बोधन गर्दै उहाँले पार्टीभित्रको आन्तरिक एकता, अनुशासन, नियमित संगठन विस्तार र जनताका मुद्दाप्रति जवाफदेही बन्न सके मात्र नेपाली काँग्रेसप्रतिको जनविश्वास अझ सुदृढ हुने बताउनु भयो। वडा तहदेखि जिल्ला तहसम्म संगठनलाई प्रभावकारी बनाउँदै कार्यकर्तालाई सक्रिय परिचालन गर्नुपर्नेमा उहाँले जोड दिनु भयो।
पार्टीका कार्यबाहक सभापति नवराज थोकरको अध्यक्षतामा सम्पन्न बैठकमा उपसभापति लेखबहादुर कार्कीले पार्टीलाई संस्थागत रूपमा बलियो बनाउन सबै तहका नेता–कार्यकर्ताबीच समन्वय, अनुशासन र सक्रियता आवश्यक रहेको धारणा राख्नु भयो।
नेपाल तरुण दलका रमेश खड्काले युवाको ऊर्जालाई पार्टी निर्माण र जनपरिचालनमा प्रभावकारी रूपमा उपयोग गर्नुपर्ने बताउनु भयो। नेपाल दलित संघका मुक्तबहादुर महतले सामाजिक समावेशिता, समान अवसर र दलित समुदायको अर्थपूर्ण सहभागिताले मात्रै संगठन थप मजबुत बन्ने धारणा व्यक्त गर्नु भयो।
नेपाल महिला संघकी केन्द्रीय सदस्य रामकुमारी डाँगीले पार्टीका सबै तहमा महिलाको नेतृत्व विकास र सक्रिय सहभागिता बढाउनुपर्ने आवश्यकता औँल्याउँदै संगठन निर्माणमा महिलाको भूमिका अझ प्रभावकारी बनाउनुपर्ने बताउनु भयो।
बैठकमा जिल्ला कार्यसमितिका पदाधिकारी तथा सदस्यहरूले पनि पार्टी सुदृढीकरण, संगठन विस्तार, जनसम्पर्क अभिवृद्धि र आगामी राजनीतिक गतिविधिलाई प्रभावकारी बनाउने विषयमा आ–आफ्ना धारणा राख्नु भएको थियो।
बैठकमा कार्यबाहक सभापति नवराज थोकरले प्राप्त सुझावलाई कार्ययोजनाका रूपमा कार्यान्वयन गर्दै जिल्लाभर पार्टी संगठनलाई थप सशक्त र गतिशील बनाइने बताउनु भयो। उहाँले पार्टीभित्रको एकता, अनुशासन र सक्रिय संगठन नै आगामी चुनौती सामना गर्ने मुख्य आधार भएको उल्लेख गर्दै सबै नेता तथा कार्यकर्तालाई साझा लक्ष्यका साथ अघि बढ्न आग्रह गर्नु भयो। कार्यक्रम पार्टि सचिव दिपक खड्रकाले संचालन गर्नु भएके थियो।
