विद्यालय र अभिभावकबीचको सम्पर्कलाई थप प्रभावकारी बनाउन उमाकुण्ड गाउँपालिकाले पालिकाभित्रका सबै सामुदायिक विद्यालयलाई मोबाइल सेट र सिम कार्ड वितरण गरेको छ। विद्यार्थीको शैक्षिक प्रगति, उपस्थिति र विद्यालयका गतिविधिबारे अभिभावकलाई समयमै जानकारी गराई समन्वय बढाउने उद्देश्यले यो कार्यक्रम सुरु गरिएको हो।
गाउँपालिका उपाध्यक्ष सावित्री सुनुवारले शुक्रबार आयोजित एक समारोहका बीच प्रधानाध्यापकहरूलाई ती सामग्री हस्तान्तरण गर्नुभयो। अब विद्यालयहरूले यही आधिकारिक नम्बरमार्फत विद्यार्थीको नतिजा, व्यवहार र आकस्मिक सूचनाहरू प्रवाह गर्नेछन् भने अभिभावकले पनि आफ्ना सुझाव र गुनासो राख्न सक्नेछन्। कार्यक्रमको दिगोपनाका लागि गाउँपालिकाले सञ्चार खर्चबापत माध्यमिक विद्यालयलाई वार्षिक ५ हजार र आधारभूत विद्यालयलाई २ हजार ५ सय रुपैयाँ उपलब्ध गराउने व्यवस्था समेत गरेको छ। यस पहलबाट विद्यालयप्रति अभिभावकको उत्तरदायित्व र अपनत्व बढ्ने अपेक्षा गरिएको छ।
