काठमाडौँ । राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशन अब चितवन उद्योग संघको अन्तर्राष्ट्रिय प्रदर्शनी केन्द्रमा आयोजना हुने भएको छ । यसअघि रत्ननगर नगरपालिकाको टाँडीस्थित होटल स्टारमा महाधिवेशन गर्ने तयारी गरिएको थियो ।
रास्वपाका केन्द्रीय सदस्य राजन गौतमका अनुसार महाधिवेशन स्थल परिवर्तन गर्दै भरतपुरस्थित चितवन उद्योग संघको अन्तर्राष्ट्रिय प्रदर्शनी केन्द्रमा आयोजना गर्ने निर्णय गरिएको हो ।
स्थल परिवर्तन भएसँगै टाँडीमा निर्माण गर्न लागिएको करिब ६ हजार जना अट्ने बाँसको पण्डाल निर्माण कार्यसमेत स्थगित गरिएको उनले जानकारी दिए ।
रास्वपाले आगामी असार ७ देखि ९ गतेसम्म प्रथम राष्ट्रिय महाधिवेशन आयोजना गर्दैछ । महाधिवेशनमा देशभरबाट आउने प्रतिनिधि तथा सहभागीका लागि सौराहा, रत्ननगर र भरतपुरका विभिन्न होटलमा आवास व्यवस्थापन मिलाइएको जनाइएको छ ।
महाधिवेशन तयारीलाई व्यवस्थित बनाउन पार्टीको स्थानीय जिल्ला तथा नगर कमिटी, जिल्लास्थित केन्द्रीय सदस्य र प्रतिनिधिसभा सदस्यहरूको समन्वयमा १८ वटा उपसमिति गठन गरेर काम अगाडि बढाइएको रास्वपाले जनाएको छ ।
रास्वपाले पहिलोपटक गर्न लागेको राष्ट्रिय महाधिवेशनलाई पार्टी संगठन विस्तार, भावी राजनीतिक रणनीति तथा नेतृत्व चयनका दृष्टिले महत्वपूर्ण रूपमा हेरिएको छ ।
