अबदेखि गणतन्त्र दिवसको मूल समारोहलाई प्रधानमन्त्रीको सट्टा राष्ट्रपतिले सम्बोधन गर्ने भएका छन्। मन्त्रिपरिषद्को पछिल्लो बैठकले गणतन्त्रको प्रतीक राष्ट्रपति नै भएकाले सो राष्ट्रिय दिवसमा राष्ट्रप्रमुखबाटै सम्बोधन हुनु उपयुक्त हुने निर्णय गरेको हो। मन्त्रिपरिषद्को निर्णय र प्रधानमन्त्रीको अनुरोध पत्र लिएर मुख्य सचिव सुमनराज अर्याल आइतबार राष्ट्रपति भवन शीतल निवास पुगेका थिए।
नेपालमा २०६५ जेठ १५ गते गणतन्त्र घोषणा भएयता प्रत्येक वर्ष सैनिक मञ्च टुँडिखेलमा आयोजना हुने विशेष समारोहमा प्रधानमन्त्रीले सम्बोधन गर्ने चलन थियो। सोही परम्परा अनुसार गत वर्षहरूमा प्रधानमन्त्रीहरू केपी शर्मा ओली, पुष्पकमल दाहाल ‘प्रचण्ड’ र शेरबहादुर देउवाले सम्बोधन गरेका थिए। विशिष्ट पदाधिकारीहरूको उपस्थिति रहने उक्त गरिमामय समारोहलाई अबदेखि राष्ट्रपतिको सम्बोधनले नयाँ परम्परा दिने भएको छ।
