पाँचथरको याङवरक गाउँपालिका–६ अर्चलेमा आज (शुक्रबार) बिहान प्रदेश ०१–००२ च १५६९ नम्बरको सिङ्गल क्याप पिकअप जिप दुर्घटना हुँदा चालकको घटनास्थलमै मृत्यु भएको छ। मृत्यु हुनेमा झापाको बाह्रदशी गाउँपालिका–५ निवासी ३५ वर्षीय गोपाल भट्टराई रहनुभएको छ।
जिल्ला प्रहरी कार्यालय पाँचथरका प्रहरी नायव उपरीक्षक अनिषकुमार कर्णका अनुसार ओरालो बाटोमा जिप रोकेर यात्रु पिसाब फेर्न ओर्लिएका बेला गाडी अचानक गुडेर भिरबाट खसेको थियो। जिपमा चालकसहित दुई जना सवार हुनुहुन्थ्यो। मृतक भट्टराईको शव परीक्षणका लागि पाँचथर जिल्ला अस्पताल लगिएको प्रहरीले जनाएको छ।
