नेपालका प्रख्यात पर्वतारोही कामीरिता शेर्पाले विश्वको सर्वोच्च शिखर सगरमाथाको ३२औँ पटक सफल आरोहण गरेर इतिहासमा नयाँ अध्याय थप्नुभएको छ। यसअघि आफैँले कायम गरेको ३१औँ पटकको विश्वकीर्तिमानलाई भंग गर्दै उहाँले सगरमाथाको चुचुरोमा मानव पाइलाको नयाँ इतिहास रच्नुभएको हो।
अभियान अधिकारीहरूका अनुसार सोलुखुम्बुको थामेका ५६ वर्षीय शेर्पा आज बिहान १० बजेर १२ मिनेटमा सगरमाथाको शिखरमा पुग्न सफल हुनुभएको हो। यो ऐतिहासिक आरोहणसँगै उहाँले विश्वकै सबैभन्दा धेरै पटक सगरमाथाको सफल आरोहण गर्ने कीर्तिमानी आरोहीको रूपमा आफ्नो स्थानलाई अझ मजबुत र अकाट्य बनाउनुभएको छ। यसअघि उहाँले गत वर्ष २०८२ साल जेठ १३ गते सगरमाथाको सफल आरोहण गर्नुभएको थियो।
विगत लामो समयदेखि पर्वतारोहण क्षेत्रमा क्रियाशील शेर्पाले २४ वर्षको युवा उमेरमा विक्रम संवत् २०५१ सालमा पहिलोपटक सगरमाथाको सफल आरोहण गर्नुभएको थियो। त्यसयता उहाँले सगरमाथा मात्र नभई विश्वका अन्य जोखिमपूर्ण एवं आठ हजार मिटरभन्दा अग्ला हिमालहरू केटू, मनास्लु र ल्होत्से लगायतका चुचुराहरू गरी कुल ४५ पटक आरोहण गरिसक्नुभएको छ। अद्भूत क्षमताका धनी शेर्पाले एकै सिजनमा दोहोर्याएर पाँच पटकसम्म सगरमाथाको शिखर चुमिसकेको अनुपम रेकर्ड समेत कायम छ।
विश्वभर ‘एभरेस्ट म्यान’ को उपनामले सुपरिचित कामीरिताले प्रत्येक आरोहणसँगै आफ्नै रेकर्ड तोड्दै विश्वभर नेपाल र नेपालीको शानलाई उच्च बनाउँदै आउनुभएको छ। उहाँको यो अभूतपूर्व सफलताले नेपाली पर्वतारोहणको इतिहासमा मात्र नभई विश्व खेलकुद र साहसिक क्षेत्रमा समेत ठूलो गौरव थपेको छ।
