लिखु तामाकोशी गाउँपालिकामा वैशाख २४ गतेदेखि सुरु भएको ‘अध्यक्ष/उपाध्यक्ष कप खुल्ला पुरुष भलिबल प्रतियोगिता–२०८३’ आइतबार भव्यताका साथ सम्पन्न भएको छ। “स्वास्थ्यका लागि खेलकुद, राष्ट्रका लागि खेलकुद” भन्ने मूल नाराका साथ लिखु तामाकोशी गाउँपालिका खेलकुद विकास समिति, धोबीले आयोजना गरेको यस प्रतियोगिताको उपाधि चिलाउने तामाङ समाजले हात पारेको छ।
झट्टेश्वर माध्यमिक विद्यालयको खेलमैदानमा सञ्चालन भएको प्रतियोगिताको अन्तिम खेल शनिबार नै सम्पन्न हुनुपर्ने तालिका रहे तापनि वर्षाका कारण प्रभावित भएपछि आज आइतबार बिहान फाइनल खेल खेलाइएको थियो। निकै प्रतिस्पर्धात्मक फाइनल खेलमा मुगिखोला युवा क्लबलाई हराउँदै चिलाउने तामाङ समाजले प्रथम स्थान हासिल गर्न सफल भएको हो।
प्रतियोगितामा प्रथम हुने चिलाउने तामाङ समाजले नगद २ लाख ५० हजार रुपैयाँ सहित ट्रफी र मेडल प्राप्त गरेको छ। त्यस्तै, द्वितीय स्थानमा चित्त बुझाएको मुगिखोला युवा क्लबले १ लाख ५० हजार रुपैयाँ पुरस्कार पाएको छ। प्रतियोगितामा उज्यालो नेपाल पार्टीले तेस्रो स्थान हासिल गर्दै १ लाख रुपैयाँ प्राप्त गर्यो भने मन्थली अप्टिकल ग्लास हाउसले सान्त्वना स्थान प्राप्त गरी ५० हजार रुपैयाँ पुरस्कार जितेको छ।
खेलकुदको विकास र स्वस्थ समाज निर्माण गर्ने उद्देश्यले आयोजना गरिएको यस प्रतियोगिताका लागि टिम दर्ता शुल्क १० हजार रुपैयाँ तोकिएको थियो। वैशाख २६ गतेसम्म सञ्चालन हुने भनिएको प्रतियोगिता मौसमको प्रतिकुलताका कारण एक दिन ढिला गरी सम्पन्न भए पनि खेल प्रेमीहरूको उत्साहजनक सहभागिता रहेको आयोजक समितिले जनाएको छ। स्थानीय स्तरमा खेल प्रतिभाको पहिचान र प्रवर्द्धन गर्न यस प्रतियोगिताले ठुलो सहयोग पुर्याएको विश्वास लिइएको छ।
