युवराज श्रेष्ठ
काठमाडौँ । बागमती प्रदेश सरकारले प्रदेशभित्रका पर्यटकीय सम्भावनालाई व्यवस्थित विकास गर्न ‘एक निर्वाचन क्षेत्र, एक पर्यटकीय गन्तव्य’ अवधारणाअन्तर्गत अध्ययन सुरु गर्ने भएको छ । प्रदेशको १५ वर्षे पर्यटन रणनीतिक योजना कार्यान्वयनका क्रममा चालु आर्थिक वर्षमै उक्त अध्ययन अघि बढाइने संस्कृति तथा पर्यटन मन्त्रालयले जनाएको छ ।
प्रदेश सरकारले पर्यटन क्षेत्रलाई आर्थिक उन्नति र रोजगारी सिर्जनाको प्रमुख आधारका रूपमा स्थापित गर्ने लक्ष्यसहित प्राकृतिक, धार्मिक, सांस्कृतिक तथा साहसिक पर्यटनको सम्भाव्यता पहिचान गर्न लागेको हो । मन्त्रालयका अनुसार प्रत्येक निर्वाचन क्षेत्रमा कम्तीमा एउटा विशिष्ट पर्यटकीय गन्तव्य छनोट गरी त्यसको पूर्वाधार विकास, प्रचारप्रसार र पर्यटन गतिविधि विस्तार गरिनेछ ।
संस्कृति तथा पर्यटनमन्त्री सुरेश श्रेष्ठले बागमतीलाई मुलुककै अग्रणी पर्यटकीय ‘ब्राण्ड’का रूपमा विकास गर्न प्रदेश सरकार प्रतिबद्ध रहेको बताए । उनले पर्यटन विकासमा निजी क्षेत्रसँग सहकार्यलाई प्राथमिकतामा राखिएको उल्लेख गर्दै पर्यटन व्यवसायीलाई परेका समस्या समाधान गर्न सरकार तयार रहेको बताए ।
रणनीतिक योजनाअन्तर्गत पर्यटन पूर्वाधार निर्माण, पर्यटकीय गन्तव्यको पहिचान तथा प्रवर्द्धन, साहसिक पर्यटन महोत्सव आयोजना, होमस्टे क्षमता विकास, पर्यटन गाइड तालिम तथा डिजिटल प्रचार अभियान सञ्चालन गरिने मन्त्रालयले जनाएको छ ।
मन्त्रालयका सचिव दिपेन्द्र सुवेदीका अनुसार मूर्त तथा अमूर्त सम्पदाको संरक्षण, आरोग्य पर्यटनको सम्भाव्यता अध्ययन, नयाँ हिमशृङ्खलाको पहिचान तथा आरोहण रुटको अन्वेषण लगायत कार्यक्रमसमेत अघि बढाइनेछ । साथै सिन्धुपाल्चोकमा ‘¥याफ्टिङ स्कूल’ सञ्चालन गर्ने तयारी पनि गरिएको छ ।
‘बागमती पर्यटन डिजिटल अभियान’मार्फत अन्तर्राष्ट्रियस्तरका भ्लगर तथा सामाजिक सञ्जाल प्रभावशाली व्यक्तिमार्फत प्रदेशका पर्यटकीय क्षेत्रको प्रचारप्रसार गरिने मन्त्रालयले जनाएको छ ।
हाल बागमती प्रदेशमा काठमाडौँ उपत्यकाका सांस्कृतिक सम्पदा, चितवन राष्ट्रिय निकुञ्ज, लाङटाङ क्षेत्र, गोसाइँकुण्ड, पदयात्रा र ¥याफ्टिङजस्ता साहसिक पर्यटन गन्तव्य प्रमुख आकर्षणका रूपमा रहेका छन् । तर कमजोर पूर्वाधार, पर्यटक व्यवस्थापनको अभाव, जलवायु परिवर्तन र राजनीतिक अस्थिरताजस्ता चुनौतीले पर्यटन विकास प्रभावित भएको मन्त्रालयको विश्लेषण छ ।को छ।
