सर्लाहीको लालबन्दीमा जङ्गली बँदेलको आक्रमणबाट एक युवकको मृत्यु भएको छ । लालबन्दी नगरपालिका–१५ पिडखोल्सा बस्ने ३२ वर्षीय प्रेमबहादुर थिङ (दावा) को बँदेलको आक्रमणबाट ज्यान गएको हो ।
जिल्ला प्रहरी कार्यालय सर्लाहीका प्रवक्ता प्रहरी नायब उपरीक्षक सरोज राईका अनुसार खेतमा बाली कुरिरहेको अवस्थामा थिङलाई बँदेलले आक्रमण गरेको थियो । आक्रमणबाट गम्भीर घाइते हुनुभएका उहाँलाई उपचारका लागि महेन्द्र राजमार्गस्थित लालबन्दीतर्फ लैजाँदै गर्दा बाटोमै मृत्यु भएको प्रहरीले जनाएको छ ।
जङ्गली बँदेलले खेतमा लगाएको मकै बाली नष्ट गर्न थालेपछि थिङ केही दिनदेखि मकै गोठालोका रूपमा खेतमै बस्दै आउनुभएको थियो । सोही क्रममा गएराति बँदेलले उहाँमाथि अचानक आक्रमण गरेको बुझिएको छ ।
घटना लगत्तै पुगेको प्रहरी टोलीले मध्यराति नै घटनास्थलको मुचुल्का तयार गरी शव परीक्षणका लागि प्रादेशिक अस्पताल मलङ्गवा पुर्याएको छ । पछिल्लो समय सर्लाहीको उत्तरी चुरे क्षेत्रमा जङ्गली जनावरको आतङ्क बढेपछि स्थानीय बासिन्दा त्रसित बनेका छन् ।
