मन्थली नगरपालिकाले चालू आर्थिक वर्ष २०८२÷०८३ को हालसम्मको प्रगति विवरण सार्वजनिक गरेको छ। जिल्ला समन्वय समिति रामेछापसँगको अन्तरक्रिया कार्यक्रममा नगरपालिकाले आफ्नो वित्तीय तथा भौतिक प्रगतिको अवस्था प्रस्तुत गरेको हो।
प्रस्तुत तथ्याङ्क अनुसार संघिय सरकार र प्रदेश सरकार अनुदान तथा आन्तरिक श्रोत र गत वर्षको मौज्दात गरी कुल विनियोजित बजेट १ अर्ब ४ करोड ६५ लाख ६४ हजार रुपैयाँ रहेकोमा हालसम्म ४२ करोड ७१ लाख ९३ हजार रुपैयाँ खर्च भएको छ, जुन कुल बजेटको ४०.८१ प्रतिशत हो। कुल खर्च मध्ये चालु तर्फ ४९.८८ प्रतिशत र पुँजीगत तर्फ २०.०६ प्रतिशत प्रगति भएको देखिएको छ।
क्षेत्रगत रूपमा हेर्दा सामाजिक विकास क्षेत्रमा ४७.७४ प्रतिशत खर्च भएको छ, भने पूर्वाधार विकासमा २३.९१ प्रतिशत र आर्थिक विकास क्षेत्रमा १२.४२ प्रतिशत मात्र खर्च भएको छ। सुशासन तथा संस्थागत क्षमता विकासमा ३५.४२ प्रतिशत र कार्यालय सञ्चालन तथा प्रशासनिक क्षेत्रमा ५९.३७ प्रतिशत खर्च भएको प्रतिवेदनमा उल्लेख छ।
राजस्व तर्फ नगरपालिकाले ४ करोड २३ लाख ५५ हजार रुपैयाँ आन्तरिक राजस्व संकलन गर्ने लक्ष्य लिएकोमा हालसम्म ३ करोड २१ लाख १४ हजार ३९२ रुपैयाँ संकलन गरिसकेको छ।
योजना कार्यान्वयनको अवस्था हेर्दा उपभोक्ता समितिमार्फत सञ्चालन भएका २८८ योजना मध्ये १५४ वटा सम्पन्न भइसकेका छन् भने ठेक्का प्रक्रियाबाट सञ्चालित २९ योजना मध्ये ११ वटा सम्पन्न भएका छन्। नगरपालिकाले “शिक्षित, स्वस्थ, व्यावसायिक सहरः उत्थानशील र समृद्ध मन्थली नगर“ भन्ने नाराका साथ आफ्ना गतिविधिहरू अगाडि बढाइरहेको छ।