नेपाल स्टक एक्सचेञ्ज (नेप्से) ले सरकारी निर्णयसँग तालमेल मिलाउँदै सेयर कारोबारको समयतालिका परिवर्तन गरेको छ। अब सातामा पाँच दिन अर्थात् सोमबारदेखि शुक्रबारसम्म मात्र धितोपत्र कारोबार हुनेछ।
मन्त्रिपरिषद्को गत २२ गतेको बैठकले शनिबार र आइतबार दुई दिन सार्वजनिक बिदा दिने निर्णय गरेपछि नेप्सेले पनि सोही अनुसार नयाँ कार्यतालिका सार्वजनिक गरेको हो। यसअघि आइतबारदेखि बिहीबारसम्म कारोबार हुँदै आएकोमा अब आइतबार बजार बन्द रहनेछ भने शुक्रबार बजार खुल्नेछ। सरकारले कर्मचारीको कार्यक्षमता बढाउन र इन्धन खपत घटाउन सरकारी कार्यालयको समय बिहान ९ देखि ५ बजेसम्म तोक्दै दुई दिने साप्ताहिक बिदाको नीति लागू गरेसँगै पुँजी बजारमा पनि यो व्यवस्था कार्यान्वयनमा आएको हो।
