काठमाडौं । पूर्व प्रधानमन्त्री एवं नेकपा एमालेका अध्यक्ष केपी शर्मा ओली पक्राउ परेपछि नेकपा एमालेले देशभर विरोध प्रदर्शन सुरु गरेको छ। जेनजी आन्दोलनको जाँचबुझका लागि गठन गरिएको कार्की आयोगको प्रतिवेदन कार्यान्वयन गर्ने सरकारी निर्णयपछि विकसित घटनाक्रमले मुलुकको राजनीतिक वातावरण थप तातिएको छ।
सरकारले सुशीला कार्की नेतृत्वको अन्तरिम चुनावी सरकारले विशेष अदालतका पूर्व अध्यक्ष गौरीबहादुर कार्कीको संयोजकत्वमा गठन गरेको जाँचबुझ आयोगको प्रतिवेदन कार्यान्वयन गर्ने निर्णय गरेसँगै पूर्व प्रधानमन्त्री ओली र पूर्व गृहमन्त्री रमेश लेखकलाई पक्राउ प्रक्रिया अघि बढाइएको बताइएको छ। सोही निर्णयपछि शनिबार बिहान उनीहरू पक्राउ परेपछि एमाले आक्रोशित बनेको हो।
पक्राउको विरोधमा एमालेले देशव्यापी रूपमा विरोध प्रदर्शन सुरु गरेको छ। पार्टीले विभिन्न जिल्लामा आफ्ना कार्यकर्तालाई सडकमा उतार्दै सरकारको निर्णयको विरोधमा नाराबाजी तथा प्रदर्शन गरिरहेको जनाएको छ। काठमाडौं उपत्यकासहित प्रमुख शहरहरूमा एमाले समर्थकहरू सडकमा उत्रिएका छन्।
राजधानी काठमाडौंको च्यासलस्थित एमाले केन्द्रीय कार्यालय नजिकै पनि कार्यकर्ताहरूले प्रदर्शन गरेका छन्। प्रदर्शनका क्रममा उनीहरूले टायर बाल्दै र कार्की आयोगको प्रतिवेदनको प्रतिलिपि जलाउँदै विरोध जनाएका थिए। उक्त क्षेत्रमा प्रहरी उपस्थिति न्यून देखिएको स्थानीयहरूले बताएका छन्।
प्रदर्शनका क्रममा केही एमाले कार्यकर्ताले सञ्चारकर्मीप्रति आक्रोश व्यक्त गर्दै धम्कीपूर्ण भाषा प्रयोग गरेको घटनासमेत सार्वजनिक भएको छ। उनीहरूले पत्रकारलाई लक्षित गर्दै “देश जल्दा कहाँ थियौ ? अहिले किन खिच्या ? ब्याक हौ” जस्ता अभिव्यक्ति दिएका थिए, जसले थप विवाद सिर्जना गरेको छ।
जेनजी आन्दोलनको जाँचबुझका लागि गठन गरिएको आयोगको प्रतिवेदन सार्वजनिक भएसँगै राजनीतिक दलहरूबीच मतभेद चर्किएको छ। सरकारको निर्णयलाई एक पक्षले न्यायको प्रक्रिया भनेको छ भने एमालेले यसलाई राजनीतिक प्रतिशोधको रूपमा व्याख्या गर्दै आएको छ।
एमालेले पूर्व प्रधानमन्त्री ओलीको पक्राउपछि स्थिति गम्भीर बन्दै गएको भन्दै देशभर संगठित विरोध प्रदर्शन गर्ने निर्णय गरेको जनाएको छ। पार्टीका नेताहरूले कार्यकर्तालाई शान्तिपूर्ण रूपमा विरोध प्रदर्शन गर्न आह्वान गरे पनि सडकमा देखिएको आक्रोशले वातावरण तनावपूर्ण बनेको छ।
यस घटनाक्रमले मुलुकको राजनीतिक परिस्थिति फेरि एक पटक अस्थिरतातर्फ उन्मुख भएको विश्लेषण राजनीतिक वृत्तमा गरिएको छ। सरकार र प्रमुख विपक्षी दलबीचको टकराव बढ्दै जाँदा आगामी दिनमा आन्दोलन अझै चर्किने संकेत देखिएको छ।
हाल देशका विभिन्न स्थानमा प्रदर्शन जारी रहेको र सुरक्षा निकायले स्थिति नियन्त्रणमा राख्न निगरानी बढाएको जनाइएको छ।
