रामेछापको खाँडादेवी गाउँपालिका–३ स्थित प्रगतिशील माध्यमिक विद्यालयले आफ्नो स्थापनाको ६०औँ वर्षगाँठ (हीरक महोत्सव) भव्य रूपमा मनाएको छ। शनिबार आयोजित एक विशेष समारोहका बीच गाउँपालिका अध्यक्ष ज्ञानकुमार श्रेष्ठले महोत्सवको समुद्घाटन गर्नुभयो।
हीरक महोत्सवको अवसरमा स्मारिका विमोचन गर्नुका साथै विद्यालयलाई सहयोग पुर्याउने चन्दादाताहरूको नामावली अङ्कित शिलालेखको समेत अनावरण गरिएको छ। सोही अवसरमा विद्यालयलाई विभिन्न कालखण्डमा योगदान दिने चन्दादाता, पूर्व प्रधानाध्यापक, पूर्व व्यवस्थापन समिति अध्यक्षहरूका साथै उत्कृष्ट कार्य सम्पादन गर्ने शिक्षक, कर्मचारी र जेहेन्दार विद्यार्थीहरूलाई सम्मान गरिएको थियो।
सो समारोहमा शिक्षा विकास तथा समन्वय एकाइ रामेछापका प्रमुख नेत्रप्रसाद गजुरेल र विद्यालय व्यवस्थापन समितिका अध्यक्ष टेकबहादुर श्रेष्ठ लगायतले मन्त्व्य व्यक्त गर्नु भएको थियो । विद्यालयका प्रधानाध्यापक रामबहादुर श्रेष्ठले अनेकौँ चुनौतीका बाबजुद विद्यालयलाई यो अवस्थासम्म ल्याउन सहयोग गर्ने सबैप्रति आभार प्रकट गर्नुभयो। उहाँले भौतिक पूर्वाधारसँगै अबका दिनमा शैक्षिक गुणस्तर सुधारमा सबै सरोकारवालाहरूको सक्रिय सहभागिता र ध्यानाकर्षण हुनुपर्नेमा जोड दिनुभयो।
