काठमाडौँ । देशका विभिन्न भागमा शुक्रबार र शनिबार भारी वर्षा, हिमपात तथा तीव्र हावाहुरीको सम्भावना रहेको पूर्वानुमान गरिएको छ।
प्रतिकूल मौसमको सम्भावनालाई ध्यानमा राख्दै राष्टिय विपत्त जाेखिम न्यूनिकरण व्यबस्थापन प्राधिकरणले सर्वसाधारणलाई अत्यावश्यक काम बाहेक यात्रा नगर्न आग्रह गरेको छ। हावाहुरीका बेला घरका झ्यालढोका राम्रोसँग बन्द गर्न तथा आगोका स्रोतहरू सुरक्षित रूपमा बन्द गर्न पनि अनुरोध गरिएको छ।
सवारी साधन चलाइरहेका अवस्थामा हावाहुरी आएमा सुरक्षित स्थानमा रोकिन, भिडभाडमा नआत्तिन र भागदौड नगरी विस्तारै सुरक्षित स्थानतर्फ जान पनि अपिल गरिएको छ।
त्यसैगरी, हावाहुरीका समयमा कमजोर संरचना, अग्ला रुख, टेलिफोन तथा बिजुलीका खम्बा र तारमुनि नबस्न, लत्रिएका बिजुलीका तार नछुन तथा विद्युतीय उपकरण प्रयोग नगर्न सचेत गराइएको छ।
सम्भावित जोखिम न्यूनीकरणका लागि समयमै सतर्कता अपनाउन सम्बन्धित निकायले सबैमा आग्रह गरेको छ।
