बर्दिया राष्ट्रिय निकुञ्जको घना जङ्गलमा सिकार खेल्न पसेका सुर्खेतका पाँच जना युवाहरू बेपत्ता भएका छन्। सुर्खेतको बराहताल गाउँपालिका र लेकवेशी नगरपालिका घर भएका यी युवाहरू आइतबारदेखि निकुञ्जभित्र सम्पर्कविहीन भएपछि उनीहरूको खोजीका लागि प्रहरी टोली परिचालन गरिएको छ। जिल्ला प्रहरी कार्यालय सुर्खेतका अनुसार सिकारको उद्देश्यले निकुञ्ज छिरेका उनीहरू लामो समयसम्म घर नफर्किएपछि परिवारले प्रहरीलाई खबर गरेका थिए।
बेपत्ता हुनेहरूमा २५ देखि ४५ वर्ष उमेर समूहका रेशम समसेली, रविलाल दमाई, रामबहादुर घर्ती, सुनिल समसेली र दुर्गाबहादुर सिजाली रहेका छन्। हाल प्रहरी सहायक निरीक्षक टोपेन्द्र सिंह ठकुरीको नेतृत्वमा विशेष टोलीले निकुञ्ज क्षेत्रमा खोजी कार्य तीव्र पारेको छ भने समन्वयका लागि बर्दिया प्रहरीलाई पनि जानकारी गराइएको छ। निकुञ्जभित्रका वन्यजन्तु वा अन्य प्राविधिक कारणले उनीहरू बेपत्ता भएको हुन सक्ने आशङ्का गरिएको छ।
