सुर्खेतकी १६ वर्षीया इनिशा विकको बलात्कारपछि हत्या भएको घटनामा संलग्न दोषीलाई कडा कारबाही गर्न माग गर्दै पीडित परिवारले गृहमन्त्री ओमप्रकाश अर्यालको ध्यानाकर्षण गराएका छन्। सोमबार गृह मन्त्रालयमा गृहमन्त्रीलाई भेट्दै इनिशाका दाजुहरू चन्द्र बहादुर र तपेन्द्र विकले घटनाको निष्पक्ष छानबिन गरी सत्यतथ्य सार्वजनिक गर्न र अपराधीलाई कानुनी दायरामा ल्याउन ज्ञापन-पत्र बुझाउनुभएको हो। उहाँहरूले महिला र बालबालिकामाथि हुने यस्ता जघन्य अपराध रोक्न र समाजमा सुरक्षाको प्रत्याभूति दिलाउन सरकारसँग माग गर्नुभएको छ।
ज्ञापन-पत्र बुझ्दै गृहमन्त्री अर्यालले घटनाको गम्भीरतापूर्वक अनुसन्धान भइरहेको र दोषीले कुनै पनि हालतमा उन्मुक्ति नपाउने प्रतिबद्धता जनाउनुभयो। उहाँले मुलुकमा दण्डहीनताको अन्त्य गर्न सरकार दृढ रहेको बताउँदै शान्ति सुव्यवस्था कायम गर्न र अपराधीलाई सजाय दिलाउन कुनै कसर बाँकी नराख्ने आश्वासन दिनुभयो। गत फागुन २३ गते वीरेन्द्रनगरस्थित जनजागरण सामुदायिक वनमा इनिशाको बीभत्स हत्या भएको थियो, जसले अहिले न्यायका लागि चौतर्फी दबाब सिर्जना गरेको छ।
