धनगढी उपमहानगरपालिका–१३ कैलालीगाउँमा मंगलबार दुई समूहबीच झडप हुँदा दुई जना प्रहरी घाइते भएका छन्। घाइते हुनेमा वडा प्रहरी कार्यालयका प्रहरी निरीक्षक बलराम पाण्डे र जनता मावि मतदान केन्द्रमा खटिएका असई डबल बहादुर साउद रहेका छन्।
जिल्ला प्रहरी कार्यालय कैलालीका प्रहरी उपरीक्षक नरेन्द्र बहादुर चन्दका अनुसार झडप नियन्त्रण गर्न पुगेको प्रहरी टोलीमाथि नै आक्रमण भएपछि प्रहरीले ६ राउण्ड हवाई फायर गरेको थियो। घटनामा संलग्न १२ जनालाई पक्राउ गरी अनुसन्धान थालिएको छ।
घटनामा पाण्डेको हात र तिघ्रामा चोट लागेको छ र उपचारपछि ड्युटीमा फर्किएका छन्। साउदको टाउकोमा गम्भीर चोट लागेकोले अस्पतालमा उपचार भइरहेको प्रहरीले जनाएको छ।
