गृहमन्त्री ओमप्रकाश अर्यालले सोमबार रामेछापको सिरुबारीमा भएको सवारी दुर्घटनाका घाइतेहरूलाई छाउनीस्थित सैनिक अस्पताल पुगेर भेट्नुभएको छ। निर्वाचन सामग्रीसहित मतदान केन्द्रतर्फ जाँदै गरेको ना ७ ख ६७६८ नम्बरको गाडी दुर्घटना हुँदा मतदान अधिकृत डोरप्रसाद घिमिरे र प्रहरी सहायक निरीक्षक पर्शुराम यादवको निधन भएको थियो।
अस्पतालमा उपचाररत ७ जना घाइतेहरूको अवस्थाबारे जानकारी लिँदै गृहमन्त्री अर्यालले उनीहरूको शीघ्र स्वास्थ्य लाभको कामना गर्नुभयो र उपचारमा सरकारले कुनै कमी हुन नदिने प्रतिबद्धता जनाउनुभयो। घाइतेमध्ये पूजा सुनुवारको सघन उपचार कक्षा (आइसियू) मा उपचार भइरहेको छ। अन्य ६ जनाको मेडिकल वार्डमा उपचार भइरहेको छ। मन्त्रालयका उच्च अधिकारीसहित अस्पताल पुग्नुभएका मन्त्री अर्यालले कर्तव्य पालनाको सिलसिलामा भएको यो दुखद घटनाप्रति गहिरो दुःख व्यक्त गर्नुभएको छ।
