रामेछाप — रामेछापमा जेसिजद्वारा होली मिलन कार्यक्रम भव्यताका साथ सम्पन्न भएको छ। रङ, अबिर तथा आपसी सद्भावको पर्वका रूपमा मनाइने होलीको अवसरमा आयोजित कार्यक्रममा जेसिजमा आबद्ध सदस्यहरूले एकअर्कालाई रङ लगाउँदै उल्लासपूर्वक पर्व मनाएका थिए।
कार्यक्रमलाई सम्बोधन गर्दै नेपाल पत्रकार महासंघका पूर्वअध्यक्ष हिमाल ढुंगेलले होली पर्वले आपसी सद्भाव, एकता र भाइचाराको सन्देश प्रवाह गर्ने उल्लेख गर्दै यस सांस्कृतिक परम्परालाई जोगाइराख्न सबैले जिम्मेवार बन्नुपर्ने बताए।
त्यसैगरी जेसिज रामेछापका अध्यक्ष कुमार श्रेष्ठले होली पर्वको धार्मिक तथा सांस्कृतिक महत्वमाथि प्रकाश पार्दै संस्थाको वार्षिक कार्यतालिका अनुसार नै होली मिलन कार्यक्रम आयोजना गरिएको जानकारी दिए। उनले यस्ता कार्यक्रमले संस्थागत एकता सुदृढ गर्न थप सहयोग पुग्ने विश्वास व्यक्त गरे।
कार्यक्रममा जेसिज वर्ष २०२५ का रामेछापका अध्यक्ष यादव केसी तथा वर्तमान जेसिज रामेछापका कानुनी सल्लाहकार सुमन खड्काले पनि शुभकामना मन्तव्य व्यक्त गरेका थिए।
रङ आदान–प्रदान, आपसी शुभकामना आदान–प्रदान तथा सामूहिक तस्बिर खिच्ने कार्यक्रमसँगै होली मिलन कार्यक्रम खुसीयाली र सद्भावको सन्देशसहित सम्पन्न भएको थियो।
