प्रतिनिधिसभा निर्वाचन नजिकिँदै जाँदा मतदानका लागि काठमाडौं उपत्यकाबाट आ–आफ्नो गृहजिल्ला फर्किने मतदाताको चाप उल्लेखनीय रूपमा बढेको छ। निर्वाचनको मिति नजिकिँदै गर्दा बसपार्क र बाहिरिने नाकाहरूमा यात्रुको भीड बढ्दो देखिएको छ।
निजी क्षेत्रका यातायात सेवा प्रदायक लोत्से बहुउद्देश्यीय संस्थाका मानव संशाधन प्रमुख पंकज मल्लका अनुसार शुक्रबार ३७४ र शनिबार ३१७ सार्वजनिक यात्रीबाहक बसमार्फत गरी दुई दिनमा करिब ८० हजार यात्रु उपत्यका बाहिरिएका छन्। उनका अनुसार निर्वाचनको मिति झनै नजिकिँदै जाँदा यात्रुको संख्या अझ बढ्ने अपेक्षा गरिएको छ।
उता काठमाडौं उपत्यका ट्राफिक प्रहरी कार्यालयका प्रहरी नायब उपरीक्षक सुनिलजंग शाहले पनि पछिल्लो दुई दिनमै करिब ८० हजार यात्रु उपत्यका छाडेको जानकारी दिए। ट्राफिक व्यवस्थापनलाई सहज बनाउन अतिरिक्त जनशक्ति परिचालन गरिएको उनले बताए।
