काठमाडौं । नेपाली कांग्रेसको सोमबार बिहान ११ बजेका लागि बोलाइएको संसदीय बोर्डको बैठक अझै बस्न नसक्दा पार्टीका तर्फबाट उम्मेदवारहरू औपचारिक रूपमा सार्वजनिक हुन सकेका छैनन्।
पार्टी प्रवक्ता देवराज चालिसेका अनुसार केही निर्वाचन क्षेत्रमा उम्मेदवारहरू टुंगिए पनि संसदीय बोर्डको औपचारिक बैठक बसेर निर्णय नभएकाले नाम सार्वजनिक गर्न नमिल्ने अवस्था रहेको छ। उनका अनुसार रणनीतिक महत्वका केही सिट बाहेक अधिकांश स्थानमा उम्मेदवार तय भइसकेका छन्।
“केही उम्मेदवारहरूले टिकटसमेत लगेर गइसकेका छन्, तर संसदीय बोर्डको बैठक बसेर औपचारिक निर्णय गर्न बाँकी रहेकाले सार्वजनिक गर्न मिलेको छैन,” प्रवक्ता चालिसेले बताए।
उनका अनुसार शीर्ष तहका नेताहरू प्रतिस्पर्धा गर्ने तथा रणनीतिक महत्वका करिब २०–२२ सिटमा सन्तुलन मिलाउन बाँकी रहेकाले ती सिटहरू मंगलबार बिहानसम्म टुंग्याउने प्रयास भइरहेको छ।
यसैबीच, राष्ट्रिय स्वतन्त्र पार्टीकी निवर्तमान सांसद सुमना श्रेष्ठ नेपाली कांग्रेसबाट निर्वाचन लड्ने तयारीमा रहेको चर्चाबारे प्रतिक्रिया दिँदै प्रवक्ता चालिसेले संसदीय बोर्डको निर्णय नआएसम्म औपचारिक रूपमा केही भन्न नमिल्ने बताए। यद्यपि कांग्रेसले केही नयाँ निर्णय गर्न लागेको संकेत उनले दिएका छन्।
स्रोतका अनुसार कांग्रेसले सुमना श्रेष्ठलाई काठमाडौं क्षेत्र नं. १ वा ४ बाट उम्मेदवार बनाउने तयारी गरिरहेको छ। त्यस्तै, जेन–जी अभियन्ता रक्षा बमसँग पनि उम्मेदवारीको विषयमा छलफल भइरहेको बताइएको छ।
संसदीय बोर्डको बैठक बस्न नसक्दा कांग्रेसको उम्मेदवार चयन प्रक्रिया केही ढिलाइ भएको देखिए पनि बैठकपछि सबै निर्णय सार्वजनिक गरिने पार्टीले जनाएको छ।
