काठमाडौं । प्रतिनिधिसभा निर्वाचनको मिति २१ फागुन यथावत् रहने भए पनि उम्मेदवारी दर्ता (मनोनयन) को समय केही दिन सर्न सक्ने संकेत निर्वाचन आयोगले गरेको छ।
दलहरूलाई उम्मेदवार छनोट गर्न समय अपुग भएको भन्दै मनोनयन मिति सार्न औपचारिक तथा अनौपचारिक माग आयोगसम्म पुगेपछि आयोगले मिति पुनर्विचार गर्न सक्ने संकेत दिएको हो। आयोगका एक आयुक्तका अनुसार विभिन्न राजनीतिक दलबाट मनोनयनको मिति सार्न चौतर्फी दबाब आएको छ।
प्रत्यक्षतर्फको उम्मेदवारी दर्ता मितिबारे प्रतिक्रिया दिँदै ती आयुक्तले आइतबार अनलाइनखबरसँग भने, “चौतर्फी दबाब आएको छ, सर्वदलीय सहमति भयो भने एक–दुई दिन मिति सर्न सक्छ।” उनका अनुसार निर्वाचनको मूल मिति भने प्रभावित नहुने गरी मात्रै मनोनयनको समय समायोजन गरिनेछ।
निर्वाचन आयोगले २१ फागुनमा हुने चुनावको कार्यतालिका यथावत् राख्दै मनोनयन प्रक्रियामा मात्रै लचकता अपनाउने तयारी गरेको बुझिएको छ। यसबीच, निर्वाचन आयोगले नेपाली कांग्रेसको विशेष महाधिवेशनलाई वैधानिकता दिएको निर्णयविरुद्ध शेरबहादुर देउवा पक्ष सर्वोच्च अदालत पुगेको छ।
देउवा पक्षले आयोगमै पुगेर पनि मनोनयन मिति सार्न आग्रह गरेको बताइएको छ। आयोगले सबै राजनीतिक दलसँग छलफल गरी सर्वदलीय सहमति जुटेमा मात्रै मनोनयन मिति परिवर्तन गर्ने जनाएको छ।
