काठमाडौँ । नेपाली कांग्रेसले पार्टीभित्र अग्रज नेताहरूको अभिभावकत्व आगामी दिनमा पनि निरन्तर रहने विश्वास व्यक्त गरेको छ । शनिबार काठमाडौंमा बसेको कांग्रेस केन्द्रीय कार्यसमिति बैठकले पार्टीको एकता, सद्भाव र सहकार्यलाई सुदृढ बनाउँदै अघि बढ्न अग्रज नेताहरूको भूमिका अझै महत्वपूर्ण रहने निष्कर्ष निकालेको हो ।
बैठकपछि पार्टी प्रवक्ता देवराज चालिसेले निवर्तमान सभापति शेरबहादुर देउवालगायत वरिष्ठ नेताहरूले पार्टीलाई दिएको योगदानको उच्च मूल्याङ्कन गर्दै आभार व्यक्त गर्ने निर्णय भएको जानकारी दिए । उनका अनुसार पार्टीलाई विभिन्न राजनीतिक उतारचढावबाट सुरक्षित राख्न अग्रज नेताहरूको अनुभव, मार्गदर्शन र अभिभावकत्व आगामी दिनमा पनि आवश्यक रहने बैठकको ठहर छ ।
प्रवक्ता चालिसेले पार्टीभित्रको एकता नै सबैभन्दा ठूलो शक्ति भएको उल्लेख गर्दै आन्तरिक मतभेदलाई संवाद र सहकार्यका माध्यमबाट समाधान गर्दै अघि बढ्ने प्रतिबद्धता व्यक्त गरे । कांग्रेस विभाजित नभएको र अब पार्टीभित्र अनावश्यक विवादको ठाउँ नरहेको उनको भनाइ थियो ।
बैठकले पार्टीलाई आगामी निर्वाचनका लागि पूर्ण रूपमा केन्द्रित गर्ने निर्णय समेत गरेको छ । त्यसका लागि संगठन सुदृढीकरण, कार्यकर्ताको मनोबल उच्च राख्ने र सबै पक्षलाई समेटेर अघि बढ्ने रणनीति तय गरिएको प्रवक्ता चालिसेले बताए ।
उनका अनुसार आगामी निर्वाचनका लागि टिकट वितरणको प्रक्रिया पार्टीको विधानअनुसार संसदीय बोर्डमार्फत अघि बढाइनेछ । निर्वाचन आयोगबाट कांग्रेसले आधिकारिकता प्राप्त गरिसकेकाले अब पार्टीभित्र भिन्न मत राखेर अन्योल सिर्जना गर्न आवश्यक नरहेको बैठकको निष्कर्ष रहेको उनले जानकारी दिए ।
कांग्रेस केन्द्रीय कार्यसमितिको बैठकले अग्रज नेताहरूको अनुभव र नयाँ नेतृत्वको ऊर्जालाई संयोजन गर्दै पार्टीलाई नयाँ उचाइमा पुर्याउने विश्वास व्यक्त गरेको छ ।
