काठमाडौं । नेपाली कांग्रेसको विशेष महाधिवेशनबाट नयाँ नेतृत्व चयन भएपछि पार्टीको केन्द्रीय कार्यसमितिको पहिलो बैठक बस्ने भएको छ । गगन थापाको नेतृत्वमा निर्वाचित केन्द्रीय कार्यसमितिको बैठक १ माघमा ललितपुरको कुपन्डोलमा बस्ने तय भएको हो ।
महामन्त्री प्रदीप पौडेलको सचिवालयका अनुसार बैठक बिहान ११ बजे सुरु हुनेछ । विशेष महाधिवेशनबाट सर्वसम्मत रूपमा चयन भएको नयाँ कार्यसमितिले पार्टीको आगामी कार्यदिशा, संगठनात्मक व्यवस्थापन तथा समसामयिक राजनीतिक विषयमा छलफल गर्ने जनाइएको छ ।
कांग्रेसको दोस्रो विशेष महाधिवेशनबाट बुधबार निर्वाचित केन्द्रीय कार्यसमितिको औपचारिक पहिलो बैठक बिहीबार बस्न लागेको हो । बैठकपछि विशेष महाधिवेशनको नतिजा र नयाँ नेतृत्वसम्बन्धी विवरण अद्यावधिक गर्न पार्टी नेतृत्व निर्वाचन आयोग जाने तयारीमा रहेको छ ।
अधिवक्ता राजु कटवालका अनुसार विशेष महाधिवेशनका कागजात तथा अभिलेख अद्यावधिक गर्न बिहीबार मध्याह्न १२ देखि १ बजेसम्म निर्वाचन आयोग जाने कार्यक्रम तय गरिएको छ । उनले विशेष महाधिवेशनसँग सम्बन्धित कागजात दस्तावेजीकरण र अभिलेख व्यवस्थापनमा आफ्नो टोलीले सहजीकरण गरिरहेको बताए ।
विशेष महाधिवेशनमार्फत नयाँ नेतृत्व चयन भएसँगै नेपाली कांग्रेसको संगठनात्मक गतिविधि थप सक्रिय हुने अपेक्षा गरिएको छ ।
