काठमाडौं। नेपाली कांग्रेसको शुभेच्छुक संस्था नेपाल प्रेस युनियनले पार्टी एकताको पक्षमा अभिमत प्रकट गर्न सबैमा आग्रह गरेको छ। कांग्रेस केन्द्रीय समिति बैठकले महामन्त्री गगन थापा र विश्वप्रकाश शर्मासहित तीन जना नेतालाई पाँच वर्षका लागि साधारण सदस्यसमेत नरहने गरी कारबाही गरेपछि पार्टी विभाजनको संकेत देखिन थालेको छ।
युनियनले जारी गरेको विज्ञप्तिमा अध्यक्ष शिब लम्सालले सबै सदस्य र सहकर्मीहरूलाई एकताको पक्षमा अभिमत प्रकट गर्न आह्वान गरेका छन्। लम्सालले भने, “लोकतन्त्रवादी पत्रकारहरूको आस्थाको धरोहर हो। प्रेस तथा अभिव्यक्ति स्वतन्त्रता र श्रमजीवी पत्रकारको हितको प्रवर्द्धनका लागि लोकतान्त्रिक शासन व्यवस्था अनिवार्य छ। बहुदलीय लोकतन्त्रले मात्र सञ्चार क्षेत्रको सरोकार बुझ्ने क्षमता राख्छ। राजनीतिक दलहरू जति सुदृढ हुन्छन्, लोकतान्त्रिक अभ्यास पनि उत्ति नै समृद्ध हुन्छ। दलहरूको विभाजनले मुलुक र लोकतन्त्र दुवैको हित गर्दैन।”
युनियनले थप भन्यो कि नेपालको सबैभन्दा पुरानो लोकतान्त्रिक पार्टी नेपाली कांग्रेस यस समय गम्भीर आन्तरिक संक्रमणको अवस्थामा छ। जेनजी आन्दोलनपछि उत्पन्न परिस्थितिलाई निर्वाचनमार्फत मूलधारमा ल्याउने र संविधानको संरक्षण गर्ने मूल जिम्मेवारीबाट विचलित भएर पार्टी विभाजन हुनु लोकतन्त्रका लागि लाभदायक हुने छैन।
प्रेस युनियनले सबै जिम्मेवार नेताहरूलाई लोकतन्त्र र मुलुकको भविष्यलाई केन्द्रमा राखेर विभाजनबाट टाढा रही एकताको यात्रा तय गर्न आग्रह पनि गरेको छ। विज्ञप्तिमा उल्लेख छ, “नेपाल प्रेस युनियनमा आबद्ध देशभरका साथीहरूलाई विचलित नहुनुहोस् र पार्टी एकताको पक्षमा अभिमत प्रकट गर्न हार्दिक अनुरोध गर्दछौं।”
नेपाल प्रेस युनियनले पार्टी एकता र लोकतान्त्रिक अभ्यासलाई सुदृढ बनाउन पत्रकारहरूको सक्रिय भूमिका अपरिहार्य भएको जिकिर गर्दै, सबैलाई एकताको पक्षमा आवाज उठाउन आह्वान गरेको छ।
