काठमाडौँ । नेपाली कांग्रेसको विशेष महाधिवेशन सहमतिभन्दा निर्वाचनतर्फ मोडिएको छ । सभापति शेरबहादुर देउवाले नेतृत्व छोड्न अस्वीकार गरेपछि विशेष महाधिवेशन पक्षधरहरूले निर्वाचन प्रक्रियामार्फत नै पार्टीको नीति र नेतृत्व टुंग्याइने स्पष्ट पारेका छन् ।
रातभर विभिन्न चरणमा भएका वार्ताहरू निष्कर्षविहीन बनेपछि निर्वाचन तालिका यथावत् राखेर प्रक्रिया अगाडि बढाइएको विशेष महाधिवेशन प्रचार–प्रसार उपसमिति संयोजक सुवास पोखरेलले जानकारी दिए । उनका अनुसार संस्थापन पक्षबाट अन्तिम समयसम्म पनि वार्ताको प्रयास भइरहेको जनाइएपछि त्यसलाई सम्मान गर्दै कार्यक्रम भने नरोकिने स्पष्ट गरिएको हो ।
पोखरेलले भने, “हाम्रो निर्वाचनको तालिका यथावत् छ । उताबाट वार्ताको प्रयास भइरहेको छ भन्ने सूचना आएको छ । हामी त्यसलाई पनि सम्मान गर्छौँ । यदि सहमति नभए हाम्रो कार्यक्रम अगाडि बढ्छ ।”
मंगलबार साँझ विशेष महाधिवेशन स्थलस्थित मिडिया सेन्टरमा आयोजित पत्रकार सम्मेलनमा पनि विशेष महाधिवेशन पक्षधरहरूले सहमति नजुटे निर्वाचनमार्फत नेतृत्व चयन गरिने दोहोर्याएका थिए । संस्थापन पक्ष विशेष महाधिवेशनको अपनत्व लिन तयार देखिए पनि सभापति देउवा नेतृत्व हस्तान्तरण गर्न तयार नभएको उल्लेख गर्दै त्यसलाई स्वीकार गर्न नसकिने उनीहरूको भनाइ छ ।
पोखरेलले सभापति देउवाले पार्टी नेतृत्व हस्तान्तरण गरी पार्टी र व्यक्तित्वसम्बन्धी लेखनमा समय दिनुपर्ने धारणा समेत सार्वजनिक गरेका छन् । अब निर्वाचन प्रक्रिया मात्र बाँकी रहेको उनको भनाइ छ ।
यसैबीच महामन्त्रीद्वय गगनकुमार थापा र विश्वप्रकाश शर्माको प्रतिवेदन मंगलबार साँझ पारित भएसँगै बन्द सत्र समापन गरिएको छ । विशेष महाधिवेशनका नेताहरूले पदाधिकारी संरचनाको खाका तयार गर्ने काम पनि तीव्र पारेको जनाइएको छ ।
बुधबार बिहान पनि वार्ताको ढोका खुला राखिँदै निर्वाचनको नयाँ तालिकाअनुसार प्रक्रिया अगाडि बढ्ने जनाइएको छ । केन्द्रीय निर्वाचन समिति संयोजक वरिष्ठ अधिवक्ता सीताराम केसीका अनुसार मनोनयन दर्ताका लागि बिहान ८ः१५ बजेदेखि ९ः१५ बजेसम्मको समय थप गरिएको छ ।
