धरान – धरान उपमहानगरपालिकाका प्रमुख हर्कराज साम्पाङ नेतृत्वको श्रम, संस्कृति पार्टीका उपाध्यक्ष राजकुमार तामाङ लामा ९देवराज० काठमाडौँको कपनबाट पक्राउ गरी पाँचथर पठाइएको छ। नेपाल प्रहरीको केन्द्रीय अनुसन्धान ब्युरो ९सीआईबी०का एआईजी मनोज केसीले अनलाइनखबरलाई जानकारी दिएका छन्।
तामाङको नाम २०८१ भदौ १४ गते भएको बम विस्फोट घटनासँग जोडिएको छ, जसमा एक बालिकाको मृत्यु भएको थियो भने दुई जना घाइते भएका थिए। एआईजी केसीका अनुसार, विस्फोटक पदार्थसम्बन्धी मुद्दामा फरार रहेका तामाङलाई मंगलबार पक्राउ गरिएको हो। उनीविरुद्ध श्यामबहादुर तामाङसहितले जाहेरी दिएका थिए।
यसअघि तामाङ ०६८ साल फागुन १५ गते काठमाडौँको बबरमहलस्थित आयल निगमको गेटमा टाइम बम विस्फोट गराएको घटनामा मुछिएका थिए। त्यसपछि उनी ०६९ असार १२ गते पाँचथरको भुसपातेबाट विस्फोटक पदार्थसहित पक्राउ परेका थिए।
उनी कर्तव्य ज्यान र ज्यान मार्ने उद्योगसम्बन्धी मुद्दामा दोषी ठहर भइसकेका थिए। तर २०७६ फागुन ११ गते प्रजातन्त्र दिवसको अवसरमा केन्द्रीय कारागारबाट रिहा भएका थिए।
हाल पाँचथर जिल्ला प्रहरी कार्यालयमा दायर विस्फोटक पदार्थसम्बन्धी मुद्दामा फरार रहेका उनलाई पुनः पक्राउ गरी अनुसन्धानको लागि नियन्त्रणमा राखिएको छ।
