शान्तिदिप युवा क्लबले तीन बर्षदेखि स्थगित रामेछापवासीका लागि काठमाडौँ- रामेछाप हवाइ उडान पुन: सुरु गर्न माग गर्दै ध्यानाकर्षण पत्र बुझाएको छ ।स्थानीयलाई लक्षित गरी हवाई उडान नहुँदा समस्या भोग्नु परेकोले तत्काल सुरु गर्न माग राख्दै प्रमुख जिल्ला अधिकारी समक्ष क्लबले ध्यानाकर्षण पत्र बुझाएको हो ।
ध्यानाकर्षण पत्रमा रामेछाप विमानस्थलबाट स्थानीयले काठमाडौँ जानआउनको लागि हवाइ सेवा प्राप्त गर्न नसकेको बारे पटक पटक ध्यानाकर्षण गराएपनि माग पुरा हुन नसकेको उल्लेख गरिएको छ । विमानलाई पार्किङ गरेर राख्ने तर सेवा नदिने प्रवृत्तिले रामेछापवासीको मौनता र धैर्यता गुमेको जनाउँदै यथासिघ्र उडान सुरु नभए विमानस्थल घेराउ सहितका कडा आन्दोलन गर्ने चेतावनी ध्यानाकर्षण पत्रमार्फत दिइएको छ ।
क्लब अध्यक्ष सुरेश उदास द्वारा हस्ताक्षरित पत्रमा बाढीपहिरोका कारण सडक यातायात कष्टकर बनेका बेला हवाइ सेवा सुरु गर्नु पर्ने माग गरिएको हो । अध्यक्ष उदासले लुक्लासम्म ५० भन्दा बढी उडान भइरहँदा रामेछापवासीका लागि काठमाडौँसम्म उडान नहुनु बिडम्बना पुर्ण अवस्था रहेको बताए । आफ्नै जिल्लामा रहेको विमानस्थलबाटै सेवा लिन जिल्लाबासी नै बञ्चित हुनुपर्दा बाध्य भएर आन्दोलनकै चेतावनी सम्म दिनु परेको उनको भनाइ छ ।
प्रमुख जिल्ला अधिकारी श्यामकृष्ण थापाले ध्यानाकर्षणपत्र बुझ्दै माग सम्बोधनका लागि पहल गर्ने प्रतिबद्धता जनाएका छन् ।
