रामेछाप । संविधान दिवस तथा राष्ट्रिय दिवसको अवसरमा शुक्रबार रामेछापमा विविध कार्यक्रमसहित दिवस मनाइएको छ । २०७२ साल असोज ३ गते तत्कालीन राष्ट्रपति डा. रामवरण यादवले नेपालको संविधान जारी गर्नुभएको ऐतिहासिक दिनको दशक पुगेको अवसरमा जिल्लास्तरीय कार्यक्रम आयोजक समितिले र्याली, अन्तरक्रिया तथा सामाजिक कार्यक्रम सम्पन्न गरेको हो ।
शुक्रबार बिहान ७ बजे मन्थलीस्थित मदन आश्रित चोकबाट कटहरबोट हुँदै जिल्ला समन्वय समितिसम्म र्याली निकालिएको थियो । त्यसपछि जिल्ला समन्वय समितिमा संविधान कार्यान्वयनबारे अन्तरक्रिया कार्यक्रम सम्पन्न भएको थियो ।
जिल्ला समन्वय समिति रामेछाप प्रमुख तथा कार्यक्रम आयोजक समिति संयोजक चिना कार्की खड्काको अध्यक्षतामा सम्पन्न कार्यक्रममा विभिन्न राजनीतिक दलका नेता–प्रतिनिधि, मन्थली नगर प्रमुख लव श्रेष्ठ, प्रमुख जिल्ला अधिकारी श्यामकृष्ण थापा, सुरक्षा निकायका प्रमुख, सरकारी तथा गैरसरकारी संस्थाका प्रतिनिधि र नागरिक समाजका पदाधिकारीहरूको उपस्थिति रहेको थियो ।
कार्यक्रममा नेपाल पत्रकार महासंघ रामेछाप अध्यक्ष दिपक कुमार घिमिरे, प्रमुख जिल्ला अधिकारी श्यामकृष्ण थापा, नेकपा माओवादी केन्द्र नेता उद्धव रम्तेल, एमाले रामेछाप सचिव प्रकाश कुमार कार्की, नेपाली काँग्रेस जिल्ला सदस्य नवराज घिमिरे, समाजवादी पार्टी अध्यक्ष रामबहादुर बुढाथोकी, रास्वपा नेतृ समिक्षा श्रेष्ठलगायतले संविधान कार्यान्वयनको उपलब्धि, कमीकमजोरी र चुनौतीबारे आ–आफ्नो धारणा राखेका थिए ।
त्यस अवसरमा नेपाल बार एसोसिएसन रामेछाप अध्यक्ष यादव दाहालले संविधान कार्यान्वयनको वर्तमान अवस्थामाथि कार्यपत्र प्रस्तुत गरेका थिए । अन्तरक्रिया सकिएपछि मन्थलीस्थित विभिन्न अस्पतालमा भर्ना भएका बिरामीलाई फलफूल वितरण गरी संविधान दिवस मनाइएको थियो ।
