मेरो प्रदेश डेक्स
मन्थली, भाद्र २४
रामेछाप सदरमुकाम मन्थलीमा भ्रष्टाचार र सोमबारको आन्दोलनमा ज्यानै जाने गरी भएको घटनाको विरोधमा जेनजीहरुले शान्तिपूर्ण प्रदर्शन गरेका छन् । केपी ओली नेतृत्वको सरकारको कार्यशैलीप्रति असन्तुष्टि जनाउँदै युवाहरू स्वतःस्फूर्त रूपमा सडकमा उत्रिएका हुन्।
सोमबारदेखि देशभर आन्दोलनका गतिविधिहरू सञ्चालन भए पनि रामेछापमा मंगलबारबाट मात्र यसको प्रभाव देखिएको हो । प्रदर्शनकारीहरूले यस आन्दोलनले राज्यलाई जिम्मेवार बनाउन दबाब पुग्ने विश्वास व्यक्त गरेका छन् ।
मंगलबार बिहान १० बजे देवकोटा चोकमा भेला भएका युवाहरूले नाराबाजीसहित बजार परिक्रमा गरेका थिए । उनीहरू जिल्ला प्रशासन कार्यालयतर्फ अगाडि बढ्न खोज्दा प्रहरीले मूल गेटबाटै रोकेको थियो । त्यसपछि जुलुस मन्थली नगरपालिका कार्यालयतर्फ मोडिन खोज्दा त्यहाँ पनि प्रहरीले अवरोध गरेको थियो । अन्ततः जुलुस पुनः देवकोटा चोकमै फर्किएर शान्तिपूर्ण रूपमा सम्पन्न भएको थियो ।
अन्य जिल्लाहरूमा जेनजी आन्दोलनले उग्र रूप लिइरहँदा मन्थलीको प्रदर्शन भने शान्त र संयमित देखिएको हो । न्यून संख्यामा युवाहरूको सहभागिता रहे पनि यसले स्थानीय स्तरमा भने केही प्रभाव पारेको स्थानीय बासिन्दाहरू बताउँछन् । आन्दोलनकारीहरूले सोमबारको घटनामा ज्यान गुमाएका १९ जनाको लागि न्याय र दोषीमाथि कारबाहीको माग गरेका छन् ।
आन्दोलन अन्तर्गत मंगलबार साँझ देवकोटा चोकमै सोमबारका मृतकहरूको सम्झनामा दीप प्रज्वलन गरिने र बुधबार रक्तदान कार्यक्रमको आयोजना गरिने जेनजी आन्दोलनका अगुवा डेनिस भण्डारीले बताए ।