काठमाडौँ– जेनजी आन्दोलनमा भएको प्रहरी दमनप्रति आक्रोश व्यक्त गर्दै कृषि तथा पशुपन्छी विकास मन्त्री रामनाथ अधिकारीले राजिनामा दिएका छन् । सोमबार भएको जेनजी आन्दोलनमा दजनौँ युवाहरुको ज्यान जाने गरी भएको दमनप्रति आक्रोश व्यक्त गर्दै मन्त्री अधिकारीले आज राजीनामा दिएका हुन् । मन्त्री अधिकारीले सामाजिक सञ्जाल फेसबुकमा देश निर्माणमा सहकार्य गर्नु पर्ने पुस्ताको शान्तिपूर्ण आन्दोलनलाई दमन गरेको बिरोध गर्दै मन्त्री पदबाट राजीनामा दिएको घोषणा गरेका छन्
सामाजिक सञ्जालमा उनले लेखेका छन्, ‘यसको जवाफ नखोजी सत्तामा बस्नु मेरा लागि सह्य भएन। ससाना कलिला छोराछोरीहरूको हत्या र दमन पश्चात देशलाई नै शोकाकुल पारेर सरकारमा बसिरहन मेरो नैतिकता र मेरो दलले मलाई प्रदान गरेको शिक्षाको खिलाफ हुने मेरो ब्रम्हले चेतावनी दिएको र मलाई मेरो पदीय जिम्मेवारीमा टाँसिइरहन अपराधबोध भएकोले देश र जनतासमक्ष नैतिक रूपमा क्षमायाचना गर्दै, सरकारको यो अलोकतान्त्रिक कदमप्रति आपत्ति जनाउँदै देश र जनतासमक्ष मन्त्री पदबाट राजीनामा पेश गरेको जानकारी गराउँदछु।’