महेन्द्रनगर (धनुषा) । नेपाली काँग्रेसका महामन्त्री गगनकुमार थापाले आन्दोलनरत उखु किसानका माग तत्काल सम्बोधन गरी दीर्घकालीन समाधानका लागि सरकारले सरोकारवाला निकायसँग गम्भीर छलफल गर्नुपर्ने बताएका छन् । जनकपुरधाम विमानस्थलमा सञ्चारकर्मीहरूसँग संक्षिप्त कुरा गर्दै थापाले उखु उत्पादन बढाउन आवश्यक पहल गर्न सरकारलाई आग्रह गरे । उनले भने, “सरकारले किसानका माग सम्बोधन गरेर उत्पादन वृद्धिमा प्रोत्साहन गर्नुपर्छ ।”
उनका अनुसार, उखुको मूल्य तोक्न ढिलाइ हुने, भुक्तानीमा समस्या देखिने र अनुदान नपाउनेजस्ता समस्या तत्काल छलफलमार्फत समाधान गर्न सकिन्छ । “प्रधानमन्त्री र अर्थमन्त्रीले यसलाई प्रतिष्ठाको विषय नबनाए आजै समाधान सम्भव छ,” थापाले स्पष्ट पारे । कृषि मन्त्रालयलाई किसानलाई प्रतिक्विन्टल ७० रुपैयाँ अनुदान दिन आग्रह गर्दै उनले चालु आर्थिक वर्षमै सरकारले रु दुई अर्ब बजेट छुट्याइसकेकोले अनुदान वितरणमा कुनै समस्या नरहेको उल्लेख गरे । सो क्रममा उनले कांग्रेस–एमाले सहकार्यमा बनेको वर्तमान सरकारमा केही असमानता रहे पनि सरकार परिवर्तन नहुने धारणा पनि राखे ।
